لایەنە براوەكانی كەركووک لەگەڵ سوودانی كۆدەبنەوە

ئاڤا نیوز

 

دوای زیاتر لە دوو مانگ لە هەڵبژاردنی ئەنجوومەنی پارێزگای کەرکووک، تاوەکو ئێستا لایەنە براوەکان بۆ دیاریکردنی پارێزگار نەگەیشتوونەتە ڕێککەوتن. پێشتر کۆبوونەوەیەک کراوە بەڵام هیچ بڕیارێکی یەکلاکەرەوە نەدرا.

 

بۆچی گرنگە؟ کەرکووک لە سێ نەتەوەی جیاواز پێکدێت و دۆخێکی تایبەتی ھەیە؛ هەموو لایەنە براوەکانی هەڵبژاردن پۆستی پارێزگاری شارەکە بە مافی خۆیان دەزانن، ئەمەش ئاستەنگی بۆ پێکهێنانی حکومەتی خۆجێیی کەرکووک دروست کردووە و ڕەنگە بەم کۆبوونەوەیە بگەنە ڕێککەوتن.

 

لێدوانی فەرمی: "یەك شەممەی داهاتوو لایەنە براوەكانی كەركووک بۆ پێشكەشەكردنی كارنامەكانی خۆیان تایبەت بە کەرکووک، لەگەڵ محەمەد شیاع سودانی، سەرۆکوەزیرانی عێراق كۆدەبنەوە". حەسەن مەجید، ئەندامی ئەنجوومەنی پارێزگای كەركووك وای بە ئاڤا نیوز گوت.

 

زانیاریی تایبەتی ئاڤا نیوز: کورد داوای پۆستی پارێزگاری کەرکووک دەکات و بە مافی خۆی دەزانی، هاوکات توركمانەكان پێشنیاری ئەوە دەکەن کە پۆستی پارێزگار و سەرۆكی ئەنجوومەنی پارێزگا، لەنێوان کورد، عەرەب و تورکمان ساڵانە دەستاودەست بکرێت.