تۆمەتبارێکی دیکەی دۆسیەی "دزیی سەدە" بە 10 ساڵ زیندانیکردن سزا درا

ئاڤا نیوز

 

لەسەر دۆسیەی "دزیی سەدە"، دادگای ناوەندیی تاوانەکانی بەرەنگاربوونەوەی گەندەڵی لە بەغدا سزای 10 ساڵ زیندانیکردنی بەسەر بەڕێوەبەری گشتیی پێشووتری دەستەی گشتی باجدا سەپاند.

 

وێنە گەورەکە: بەهۆی دۆسیەی ئاسانكاریكردن بۆ بردنەدەرەوەی بڕی 2.5 ملیار دۆلار لە بانکی ڕافیدەین وەک یەكێک لە گەورەترین سكانداڵەكانی گەندەڵی دارایی لە عێراق کە بە "دزیی سەدە" ناسراوە، تا ئێستا چەندین کەس دراونەتە دادگا و دادگایی کراون.

 

ڕاگەیێنراوی فەرمی: ئەنجوومەنی باڵای دادوەرییی عێراق ڕایگەیاند، تاوانبارەکە بە هاوبەشی لەگەڵ دوو تۆمەتباری دیکەدا دەستیان بەسەر بڕی پارەی پاشەکەوتی باجدا گرتووە، کە لە بانکی ڕافیدەین دانرابوو لە ڕێگەی چەکێکەوە لە بەرژەوەندیی کۆمپانیایەک. حوکمەکە بەپێی بڕگەکانی ماددەی 316/ بەشی 1 لە یاسای سزادانی عێراقی ژمارە 111ی ساڵی 1969 ی هەموارکراو و بەپێی ماددەکانی 47 و 48 و 49 دەرچووە.

 

ئەوەی پێویستە بیزانیت:  ئوسامە حوسام جەودەت، بەڕێوەبەری گشتیی پێشووتری دەستەی گشتی باج بووە، ئوسامە حوسام یەکێک بوو لەو کەسانەی کە بە تۆمەتیی دیارنەمانی پارەی باج لە دۆسیەی "دزیی سەدە" تۆمەتبار کرابوو.