چوار پارێزگا بەمەبەستی دابینکردنی زەوی بۆ سەربازانی کورد لە سوپای عێراق دیاریکراوە

ئاڤا نیوز

لە عێراق ئامادەسازییەکان بۆ دابەشکردنی زەوی بەسەر هێزە سەربازییەکان بەردەوامە بەپێی بەدواداچوونی ئاڤا چارەنووسی ئەو سەربازە کوردانەش یەکلایی کراونەتەوە کە لەنێو ڕیزەکانی سوپای عێراقدان.

چیرۆکی سەرەکی: هەزاران سەربازی کورد لە ڕیزی یەکە جیاوازەکانی سوپای عێراقدان، لە هەموو ماف و شایستەییەکاندا سوودمەند دەبن، لە پرۆسەی پێدانی زەوی بە هێزەکان بەهۆی ئەوەی شوێنی نیشتەجێبوونیان هەرێمی کوردستان چارەنووسیان بەنادیاری مابووە و ئێستا پێشنیازێکی نوی کراوە بۆ ئەوەی بێبەش نەبن.

زانیاریی تایبەت: فەرماندەیەکی هێزەکانی پاسەوانی سنوور بە ئاڤای گوت، "سنووری پارێزگاکانی نەینەوا، کەرکووک، سەڵاحەددین و دیالە دیاریکراون بۆ ئەوەی بەگوێرەی نزیکی شوێنی نیشتەجێبوونی سەربازەکە زەوی پێبدرێت، بەڵام ئەم پێشنیازە نەبووەتە بڕیار و ئێستا لە قۆناغی گفتوگۆدایە."

لەلایەکی دیکەوە: سابت عەباسی، وەزیری بەرگریی عێراق لە بەغدا ڕایگەیاند، "لە پارێزگاکانی هەرێمی کوردستان ئێمە ناتوانین لە شوێنی خۆیان زەوی بۆ سەربازە کوردەکان دابین بکەین و لە پارێزگاکانی دیکەی عێراق بۆیان دابیندەکرێت."