دابەشکردنی نەوت لە ناوچە شاخاوییەکانی دهۆک دەست پێدەکات

ئاڤا نیوز

دابەشکردنی نەوتی سپی بە نرخی پاڵپشتیکراو لە سنووری پارێزگای دهۆک و ئیدارەی سەربەخۆی زاخۆ دەستیپێدەکات، کار لەسەر ئەوە دەکرێت سەرجەم خێزانە نیشتەجێبووەکانی سنووری ناوچە شاخاوییەکان سوودمەند ببن.

چیرۆکی سەرەکی: وەزارەتی نەوتی عێراق 50 ملیۆن لیتر نەوتی سپی وەک پشکی نەوت و وزەی هەرێمی کوردستان دابینکرد، تاوەکو ئێستا دوو کاروانی ناردووە، ئەمساڵ پشکی پارێزگای دهۆک حەوت ملیۆن و 900 هەزار لیترە، هەر خێزانێک 100 لیتری پێدەدرێت.

لێدوانی فەرمی: کارزان ڕەئووف، بەڕێوبەری نەوت و کانزاکانی دهۆک بە ئاڤای گوت، "ئامادەسازییەکان لە قۆناغی کۆتاییدان ڕەنگە پێش کۆتایی ئەم هەفتەیە پرۆسەکە دەستپێبکەین، لە ئەولەویەتمان دایە سەرجەم خێزانەکانی سنووری ناوچە شاخاوییەکان نەوت وەربگرن.

ئەمەش بزانە: 290 هەزار خێزان لە سنووری پارێزگای دهۆک لە پرۆسەی وەرگرتنی نەوتی سپی سوودمەند دەبن، کە پێویستیی بە دابینکردنی 58 ملیۆن لیتر نەوت هەیە، ئەو بڕەی کە دابینکراوە بەشی 13% خێزانەکان دەکات.