سەرچاوەیەکی حکومەتی عێراق بۆ ئاڤا: ڕێگە بە خۆپیشاندانێک نادرێت ئارامیی تێکبدات

ئاڤا نیوز

سەرۆکی حیزبی تەقەدوم دژی فەرمانە سالارییەکەی دادگەی فیدڕاڵی بۆ ڕاگرتنی کارکردن بە یاسای لێبوردنی گشتی داوای خۆپیشاندانی فراوان دەکات، سەرچاوەیەکی حکومەتی عێراقیش ڕایگەیاند، ڕێگە بە هیچ جۆرە خۆپیشاندانێک لە پارێزگا سوننەکان نادرێت کە ببێتە مایەی تێکدانی ئاسایش و ئارامی.

چیرۆکی سەرەکی: دوێنێ دادگەی فیدڕاڵی بەکاتیی و تا یەکلاییبوونەوەی ئەو سکاڵایانەی لەسەریان تۆمارکراوە، کارکردن بە یاساکانی لێبوردنی گشتی، باری کەسی و گەڕانەوەی موڵک بۆ خاوەنە ڕەسەنەکانیانی ڕاگرت، ڕاگرتنی کارکردنیش بەیاسای لێبوردنی گشتی ناڕەزاییەکی فراوانی سوننەکانی لێکەوتووەتەوە و محەممەد حەلبووسی، سەرۆکی حیزبی تەقەدوم داوای خۆپیشاندان دژی بڕیارەکەی دادگا دەکات.

زانیاریی بەدەستهاتوو: سەرچاوەیەکی بەرپرس لە حکومەتی عێراق بە ئاڤا میدیای ڕاگەیاند:

-  تائێستا حکومەت و هیچ لایەنێکی ئەمنیی بڕیاری پێشوەختەیان نییە بۆ چۆنیەتیی مامەڵەکردن لەگەڵ ئەو خۆپیشاندانانەی سەرۆکی حیزبی تەقەدوم داوای ئەنجامدانیانی کردووە.

- "حکومەت بەگوێرەی یاسا مامەڵە لەگەڵ خۆپیشاندانەکان دەکات بەجۆرێک کە نەبنە مایەی تێکدانی ئارامی و ئاسایش لەژێر هەرناوێکدا بێت، بەتایبەت لە پارێزگا ئازادکراوەکان".

لەلایەکی دیکەوە: عەلی فەتلاوی، ئەندامی هاوپەیمانی فەتح بە ئاڤا میدیای ڕاگەیاند، داواکارییەکەی حەلبووسی، ئارامی سیاسی و ئەمنی عێراق دەخاتە مەترسییەوە و لەوانەیە هاوشێوەی ڕابردوو، لەلایەن تیرۆرستان و کەسانی گومانلێکراوەوە بقۆزرێتەوە.

وتیشی، هەمووان کۆدەنگن کە دەبێت ڕێز لە شکۆی دادگە و بڕیارەکانی بگیرێت، بۆیە نابێت لەژێر هیچ پاساوێکدا و بۆ مەبەستی "سیاسی و هەڵبژاردن" هێرشبکرێتەسەر دادگەکان، جەختیش دەکاتەوە کە پێویستە ڕووبەڕووی هەموو هەوڵێک ببنەوە کە تێکدانی دۆخی ئێستای عێراق بەئامانج دەگرێت.