ئەندامێکی لیژنەی خوێندنی باڵا: دامەزراندنی سێ یەکەمەکان کوردستانیش دەگرێتەوە

ئاڤا نیوز

حکومەتی عێراق بڕیاری دامەزراندنی پێنج هەزار و 903 یەکەمی زانکۆ و پەیمانگەکان و هەڵگرانی بڕوانامەی خوێندنی باڵای پەسەندکرد، ئەندامێکی لیژنەی خوێندنی باڵا لە پەرلەمانی عێراق دەڵێت، ئەم بڕیارە دەرچووانی هەرێمی کوردستانیش دەگرێتەوە.

وێنە گەورەکە: لە ساڵی 2018ـەوە پرۆسەی دامەزراندنی سێ یەکەمەکانی زانکۆ و پەیمانگەکانی هەرێمی کوردستان وەستاوە، لەو کاتەوە زیاتر لە 10 هەزار قوتابی بە پلەی یەکەم، دووەم و سێیەم زانکۆ و پەیمانگەیان تەواوکردووە و دانەمەزراون، سەرجەمیان بایۆمەتریان کردووە و ئامادەن بۆ دامەزراندن.

لێدوانی فەرمی: د. نەهلە ئەفەندی، ئەندامی لیژنەی خوێندنی باڵا لە پەرلەمانی عێراق بە ئاڤا میدیای گوت، "هەردوو ئەنجوومەنی ڕاژەی هەرێمی کوردستان و حکومەتی فیدڕاڵی لەسەر هێڵن بۆ ئەوەی پرۆسەکە ئەو 10 هەزار دەرچووەی هەرێمی کوردستانیش بگرێتەوە، هاوشێوەی هاوتاکردنی مووچەی خانەنشینی ئەو بۆشاییانەی لە زانکۆ و پەیمانگەکان دروست دەبێت دەرفەت بۆ دامەزراندنی یەکەمەکان دەڕەخسێنێت."

ئەمەش بزانە: بە بڕیاری سەرۆکوەزیران مەسرور بارزانی، هەزار و 300 قوتابیی یەکەمی زانکۆ و پەیمانگەکانی ساڵی خوێندنی 2016-2017 دامەزرێنران و لە ساڵی 2018ـەوە قەیرانی دارایی و بڕینی بودجەی هەرێمی کوردستان پڕۆسەکەی وەستاند.