بەهۆی دابەزینی پلەکانی گەرما سبەی لە چەند پارێزگایەکی عێراق دەکرێتە پشوو

 

ئاڤا نیوز

چەند پارێزگایەکی عێراق بەهۆی دابەزینی پلەکانی گەرما، ڕۆژی سێشەممە، لە ناوەندەکانی خوێندن دەکەنە پشوو، هاوکات بەشێکیان کاتژمێرەکانی دەوامی دامودەزگاکان کەم دەکەنەوە.

وێنە گەورەکە: ماوەی چەند ڕۆژێکە شەپۆلێکی سەرما و سۆڵە ڕووی لە عێراق و هەرێمی کوردستان کردووە و لە هەندێک شوێن بەفری چڕ باریوە، پێشبینیش دەکرێت شەپۆلەکە تا هەفتەی داهاتوو بەردەوام بێت.

زانیاریی بەدەستهاتوو: پارێزگاکانی کەرکووک، نەینەوا، دیالە، موسەنا، نەجەف، بەهۆی دابەزینی پلەکانی گەرما پشوویان لە قوتابخانەکان بۆ ڕۆژی سێشەممە ڕاگەیاند، هاوکات پارێزگای سەڵاحەددین و بابل دەوامی قوتابخانە و پەیمانگە و زانکۆکانیان کردە پشوو و لە سەڵاحەددین دەوامی دامودەزگاکان کاتژمێرێک کەمکرایەوە کە لە 9ـی بەیانی دەستپێدەکات لەبری 8ـی بەیانی.

لەلایەکی دیکەوە: بەگوێرەی شێخ دارا، شارەزای کەشناسی و پێشکەشکاری ئاڤا میدیا، ناوچەکانی کوردستان ژمارەیەکی پێوانەیی مێژووییان لە ساردی تۆمارکردووە، نزمترین پلەی گەرمی لەسەر ئاستی جیهان لە چیای ئاراراتی باکووری کوردستان تۆمارکراوە کە 40 پلە لە ژێر سفر بووە. تەنیا شارێکی ڕووسیا و ناوچەیەکی سیبریا ئەو پلەیان تۆمار کردووە.