یاسای هەڵبژاردن گۆڕانکاریی تێدا دەکرێت و هەڵبژاردنیش لە وادەی خۆیدا دەکرێت

ئاڤا نیوز

 

پەرلەمانتارێكی دەوڵەتی یاسا پشتڕاستی دەکاتەوە لە چەند مانگی داهاتوو گۆڕانکاری لە یاسای هەڵبژاردن دەکرێت و ئەندامێکی هاوپەیمانی فەتح-یش ڕەتیدەکاتەوە خواستێک لەلایەن لایەنەکانی چوارچێوەی هەماهەنگی هەبێت بۆ دواخستنی هەڵبژاردن.

 

وێنە گەورەکە: بڕیارە مانگی 10ی ئەمساڵ هەڵبژاردنی پەرلەمانی عێراق بکرێت، چاوەڕوان دەکرێت ڕکابەرییەکی تووند لە نێوان لایەنە سیاسییەکان هەبێت و گۆڕانکاریش لە نەخشەی سیاسیی ئێستای عێراق ڕووبدات.

 

لێدوانی فەرمی: باقر ساعدی، پەرلەمانتاری دەوڵەتی یاسا بە میدیای عێراقی ڕاگەیاند: جوڵەیەکی سیاسیی بە ئامانجی گۆڕینی هەندێک لە بڕگەکانی یاسای هەڵبژاردن، بەڵام تاوەکو ئێستا کۆدەنگییەک لەسەر ئەو بڕگانە نییە کە دەتوانرێت گۆڕانکارییان تێدا بکرێت، بەڵام بە گشتی ئەو بڕگانەی کە هەموار دەکرێنەوە لە نێوان سێ بۆ چوار بڕگەدایە".

 

لەلایەکی دیکەوە: عەلی فەتلاوی، ئەندامی هاوپەیمانی فەتح ڕایگەیاند: ئەو ڕاپۆرتە میدیاییانەی باس لە هەوڵی دواخستنی هەڵبژاردنی پەرلەمان لەلایەن لایەنە سیاسییەکانی نێو چوارچێوەی هەماهەنگی دەکەن، دوورن لە ڕاستییەوە.

- دووپاتیشی کردەوە، "هەموو هێزەکانی چوارچێوەی هەماهەنگی لەگەڵ ئەوەدان هەڵبژاردنی پەرلەمان لەکاتی خۆیدا پێش کۆتایی ئەمساڵ بەڕێوەبچێت و هیچ نیازێکی سیاسی و حکومی نییە بۆ دواخستنی.

 

ئەوەی پێویستە بیزانیت: پێشتر جومانە غەلای، وتەبێژی کۆمیسیۆنی هەڵبژاردنەکان بە ئاڤا میدیای ڕاگەیاندبوو: وادەی هەڵبژاردن لەلایەن دیوانی سەرۆکایەتی ئەنجوومەنی وەزیرانەوە بە هەماهەنگی لەگەڵ کۆمیسیۆنی هەڵبژاردنەکان دیاری دەکرێت، بە مەرجێک ئەم وادەیە پێش کۆتاییهاتنی خولی ئێستای پەرلەمان بێت بە ماوەی کەمتر لە 45 ڕۆژ لە یەکەم دانیشتنی پەرلەمانەوە کە لە 9-1-2022 بەڕێوەچوو.