بەشی فرۆشیاری وزەی كارەبا خزمەتگوزارییەكانی دەكاتە دیجیتاڵی

ئاڤا نیوز

 

لەپێناو ئاسانكاری بۆ ڕاییكردنی مامەڵەی هاووڵاتیان و كەمكردنەوەی ڕۆتین لە دامودەزگا حكومییەكان، بەشی فرۆشیاری وزەی كارەبا خزمەتگوزارییەكانی دەكاتە سیستمی دیجیتاڵی.

 

وێنە گەورەكە: لەچوارچێوەی پلانەكانی وەزارەتی كارەبا بۆ بەدیجیتاڵكردنی سەرجەم دامودەزگاكانی سەر بە وەزارەتەكە، بەشی فرۆشیاری وزەی كارەبای دووی هەولێر، سیستمە نوێیەكەی خستە كار و لەمەودوا مامەڵەی هاووڵاتیان لەو فەرمانگەیە بە ئەلیكترۆنی تەواو دەكرێت بێ ئەوەی هاووڵاتیان بە ڕۆتینە كارگێڕییەكان شەكەت و ماندووبن.

 

ڕاگەیێنراوی فەرمی: لەمیانی بەسەركردنەوەی بەشی فرۆشیاری وزەی كارەبا، كەمال محەممەد، وەزیری كارەبای هەرێمی كوردستان ڕایگەیاند، هەنگاوەکان بۆ پێشخستن و فراوانکردنی پڕۆژەكە خێراتر دەكەن و ئامادەیی هەموو کارئاسانییەکی بۆ راپەراندنی کارەکانیان دەربڕی.

 

لەلایەكی دیكەوە: وەزیری كارەبای هەرێمی كوردستان هەر لەم سەردانەیدا، بەدواداچوونی بۆ هەنگاوەکانی ئەزموونی پڕۆژەی ڕووناکی بۆ دابینکردنی کارەبای 24 کاتژمێری کرد، کە تا ئێستا لە 17 گەڕەكی هەولێر تەواوكراوە و بەهۆیەوە 65 هەزار هاوبەش لێی سوودمەند بوونە و پێشوازییەکی باشی لێکراوە و پڕۆژەکە سەرانسەری هەرێمی کوردستان دەگرێتەوە.