وەزیری بازرگانی بۆ خەڵکی عێراق: گۆشت کەم بخۆن نرخەکەی دادەبەزێت

ئاڤا نیوز

 

ئەسیر غرێری، وەزیری بازرگانیی عێراق، گرانبوونی نرخی گۆشت دەگەڕێنێتەوە بۆ ئەوەی تاکی عێراقی گۆشت زۆر دەخوات. 

 

لێدوانی فەرمی: ئەسیر غرێری، وەزیری بازرگانیی عێراق لە چاوپێکەوتنێکی تەلەفزیۆنیدا ڕایگەیاند: خەڵکی عێراق ڕادەبەدەر گۆشت دەخۆن، نە گۆشتی ئەو ئاژەڵانەی هاوردە دەکرێت و نە ئەوەشی لەناوخۆ پەروەردە دەکرێت بەشیان ناکات، بۆیە نرخی کیلۆیەک گۆشت ئێستا لە بازاڕەکان گەیشتووەتە 22 هەزار دینار.

 

زانیاریی زیاتر: سەبارەت بە قەبارەی هاوردەکردنی کاڵا و بەرهەمە دەرەکییەکان، غرێری ئاشکرایکرد، ساڵانە عێراق بە بەهای 86 ملیار دۆلار کاڵا و بەرهەمە دەرەکییەکان هاوردە دەکات.

 

ژماره‌كان واده‌ڵین: وەزیری بازرگانیی عێراق ئاماژەی بەوەشکرد، عێڕاق ساڵانە بە بەهای 18 ملیار دۆلار کاڵا و بەرهەمی دەرەکی لە ئیماراتەوە هاوردە دەکات، 18 ملیار دۆلار لە چین، 16 ملیار دۆلار لە تورکیا، 12 ملیار دۆلار لە ئێران، یەک ملیار دۆلار لە سعودیە و 900 ملیۆنیش لە ئوردنەوە هاوردە دەکات.