ڕێباز حەملان هۆكاری دابەشنەكردنی مووچەی مانگی 12ـی ساڵی ڕابردوو ئاشكرا دەكات

ئاڤا نیوز

 

بریكاری دەستلەکارکێشاوەی وەزارەتی دارایی عێراق هۆكاری نەناردنی مووچەی مانگی 12ـی ساڵی ڕابردوو ئاشكرادەكات و دەڵێت، وەزارەتی دارایی عێراق لێی بەرپرسە.

 

وێنە گەورەكە: لەكۆی 12 مووچەی ساڵی 2024، مووچەخۆرانی هەرێمی كوردستان مووچەی 11 مانگیان وەرگرت و تائێستاش مووچەی مانگی 12 بەنادیاری مایەوە و دابەش نەكرا.

 

لێدوانی فەرمی: ڕێباز حەملان، بریكاری دەستلەکارکێشاوەی وەزارەتی دارایی عێراق لە گەشتی هەواڵەکانی سەعات حەوتی ئاڤا ڕایگەیاند، هەرێمی كوردستان بۆ مووچەی مانگی 12 بڕی 956 ملیار دیناری پێویست بوو، كەچی تەیف سامی، وەزیری دارایی عێراق بڕی 441 ملیار دیناری نارد.

 

هۆکارە زانراوەکان: ڕێباز حەملان ڕوونیشی كردەوە، بەهۆی ئەوەی حكومەتی هەرێمی كوردستان بۆ تەمویلی مووچەی مانگی 11 كورتهێنانی هەبوو، ناچار لەو 441 ملیار دینارە پڕی كردەوە كە وەزارەتی دارایی عێراق گوایە بۆ مووچەی مانگی 12 ناردوویەتی، سەرەنجام هیچ بڕە پارەیەك بۆ مووچەی مانگی دوازدە لەبەردەستی وەزارەتی دارایی هەرێمی كوردستان نەما بۆ ئەوەی دابەشی بكات.