کافێکەی وریا غەفووری، یاریزانی بەناوبانگی کورد لە تاران دادەخرێت

ئاڤا نیوز

 

"کافێ وریا"، کە خاوەندارێتییەکەی بۆ وریا غەفووری، یاریزانی کوردی پێشووی تۆپی پێی ئێران دەگەرێتەوە، بەهۆی سەردانی گۆرانیبێژێکی دژە دەسەڵاتی ئێران لەلایەن حکومەتەوە لە شاری تاران داخرا.

 

بڵاوکراوەی فەرمی: ڕۆژی سێشەممە پەیجی "کافێ وریا" لە تۆری کۆمەڵایەتی ئینستاگرام هەواڵی داخرانی کافێکەی بڵاو کردەوە، بەڵام ئاماژەی بۆ هۆکاری داخستنی کافێکە نەکردبوو، تەنیا ئاماژەی بەوە دابوو تاوەکو کاتێکی نادیار داخراوە و سپاسی پشتگیری خەڵکی کردبوو لەوبارەیەوە.

 

لێدوانی فەرمی: سەرچاوەیەکی ئاگادار لە شاری تاران بە ئاڤا میدیای گوت: کافێ وریا بەهۆکاری سیاسی و بە دیاریکراوی لەبەر سەردانی توماج ساڵحی، گۆرانیبێژی ناڕازی لە دەسەڵاتی ئێران داخراوە.

 

زانیاریی زیاتر: وێنەی سەردانی توماج ساڵحی، کاتێک دوای سەردانەکە وریا غەفوری بەڕێی دەکات لە تۆڕە کۆمەڵایەتییەکان و ڕاگەیاندنەکان هەرزوو بڵاو کرایەوە.

 

ئەمەش بزانە: توماج ساڵحی، گۆرانییەکانی ناوەرۆکی سیاسییان هەیە و دژی سیاستەکانی حکومەتی ئێرانن، لەم نێوەندەشدا چەندینجار دەستگیر کراوە، دوایینجارش کە دەستگیرکرا سزای لەسێدارەدانی بەسەردا سەپێنرا، بەڵام بەهۆی ناڕەزایەتی زۆر حوکمەکەی شکێنرا.

 

پێدراوە ڕاستییەکان: وریا غەفووری لەدایکبووی ساڵی 1987 شاری سنەیە، کاپتنی پێشووی یانەی ئیستقلالی تارانە. یەک ساڵ لەمەوبەر ئەو کافێیەی لە تاران کردەوە. وریا غەفووری بە هەڵوێستەکانی دژی حکومەتی ئێران و بۆ پشتگیری لە خەڵک ناوبانگی هەیە و بەم هۆیەشەوە لە تۆپی پێی ئێران دوورخرایەوە.