بووکەکەی ترەمپ ڕۆڵێکی باڵا وەردەگرێت

ئاڤا نیوز

لارا ترەمپ، بووکی دۆناڵد ترەمپ، سەرۆکی پێشووی ئەمریکا، پۆستێکی باڵای لە کۆمیتەی نیشتمانی پارتی کۆمارییەکان وەرگرت؛ ترەمپیش بووکەکەی بە کەسێکی زیرەک و بە توانا وەسف دەکات.

 

بۆچی گرنگە: ئەم ڕووداوە لە بەرژەوەندی ترەمپدایە، بەوەی دەستی سەرۆکی پێشووی ئەمریکای بەسەر پارتەکەدا بەهێزتر دەکات، پێش هەڵبژاردنەکانی مانگی نۆڤەمبەری ئەمریکا.

 

چیرۆکی سەرەکی: مایکل واتلی سەرکردەی پارتی کۆمارییەکان لە باکووری کارۆلینا و لارا ترەمپ بووکەکەی ترەمپ هەردووکیان بەربژێربوون، بە ڕێککەوت هەردووکییان بە دەنگی 168 ئەندامی پارتی کۆمارییەکان لە شاری هیوستن وەک "هاوسەرۆک"ـی کۆمیتەی نیشتمانی پارتی کۆمارییەکان هەڵبژێردران.

 

زانیاریی زیاتر: ئەو پلەیەی بووکەکەی ترەمپ وەریگرتووە تایبەتە بە کۆکردنەوەی پارە بۆ کاندیدەکانی کۆمارییەکان و دواتریش بەسەریاندا دابەشی دەکات.

 

لێدوانی فەرمی: لارا ترەمپ کە هاوسەرگیری لەگەڵ ئێریک کوڕی ناوەندی سەرۆکی پێشووی ئەمریکا کردووە، گوتی: وەک خەزوورم دەڵێت، پارتەکەیان یەک ئامانجی هەیە ئەویش "بردنەوەی گەورەیە" لە ڕۆژی هەڵبژاردندا.

 

 لەلایەکی دیکەوە: دۆناڵد ترەمپ، سەرۆکی پێشووی ئەمریکا، بووکەکەی بە کەسێکی بەهرەمەند و بە توانا وەسف کرد و گوتی "ئەو دووانە بەهرەمەند و زیرەکن، پێشووتر لە ململانێدا تاقیکراونەتەوە."