فراكسیۆنی پارتی لە ئەنجوومەنی پارێزگای نەینەوا: سەرۆكی ئەنجوومەن شەرعییەتی نەماوە

ئاڤا نیوز

 

فراکسیۆنی پارتی لە ئەنجوومەنی پارێزگای نەینەوا لەبارەی بایکۆتکردنی دانیشتنەکانی ئەنجوومەنەکە ڕایدەگەیەنێت، سەرۆکی ئەنجوومەن بەدەنگی زۆرینەی ڕەهای ئەندامانی ئەنجوومەن کە نوێنەری خەڵکن لە پۆستەکەی دوورخراوەتەوە و شەرعیەتی نەماوە، دووپاتیشی دەکاتەوە، پەیڕەوکردنی سیاسەتی پشتگوێخستنی هاوسەنگی و شایستەبوون لەلایەن سەرۆکی ئەنجوومەنەوە، وایکردووە زۆرینەی ڕەهای ئەندامان بایکۆتی دانیشتنەکان بکەن. 

 

وێنە گەورەکە: دوای ئەوەی ئەنجوومەنی پارێزگای نەینەوا لە دانیشتنی ڕۆژی 5-3-2025، بەزۆرینەی ڕەها دەنگیان لەسەر لادانی ئەحمەد حاسوود، سەرۆکی ئەنجوومەنی پارێزگاکە لە پۆستەکەی دا، ئەویش لە دادگەی کارگێڕی سکاڵای تۆمارکرد و ڕۆژی 09-03-2025، دادگەی کارگێڕیی عێراق، بڕیاری دوورخستنەوەی ئەحمەد حاسوودی ڕاگرت، تاوەکو دۆسیەکەی لە دادگە یەکلادەبێتەوە.

 

ڕاگەیێنراوی فەرمی: فراکسیۆنی پارتی لە ئەنجوومەنی پارێزگای نەینەوا لەبارەی بایکۆتکردنی دانیشتنەکانی ئەنجوومەنەکە ڕایدەگەیەنێت: سەرەڕای ئەوەی سەرۆکی ئەنجوومەن وەهای نیشاندەدات کە تەنها ژمارەیەک ئەندامی ئەنجوومەنەکە ئامادەی دانیشتنەکان نابن، بەڵام بابەتە ڕاستییەکە ئەوەیە بەهۆی پەیڕەوکردنی سیاسەتی پشتگوێخستنی هاوسەنگی و شایستەبوون لەلایەن سەرۆکی ئەنجوومەنەوە، وایکردووە زۆرینەی ڕەهای ئەندامان بایکۆتی دانیشتنەکان بکەن 

 

- ئامادەنەبوونمان لە دانیشتنەکەی دوێنێی، هەڵوێستێکی کردەیی و وەڵامدانەوەی ڕاستەوخۆیە لەبەرامبەر ئەوەی لە دانیشتنی تایبەت بە لێپرسینەوە ڕوویدا.

 

- دووپاتی دەکەینەوە کە دەنگی زۆرینەی ڕەها بۆ دوورخستنەوەی سەرۆکی ئەنجوومەن ئەو شەرعیەتەیەی لێسەندووەتەوە کە ڕێگەی پێدەدات بەردەوام بێت لە پۆستەکەیدا.

 

- سەبارەت بە فەرمانی سالاری (أمر ولائی) دەرچوو لە دادگای کارگێڕی عێراق، ڕوونی دەکەینەوە کە مەبەست لێی وەستاندنی ڕێککارەکانە بۆ ماوەیەکی کاتی تا بڕیاری دادوەری لەسەر دۆسیەکە یەکلایی دەبێتەوە، بەهیچ جۆرێک شەرعیەت بۆ سەرۆکی ئەنجوومەن ناگەڕێنێتەوە. 

- ئێمە لە فراکسیۆنی پارتی دیموکراتی کوردستان پابەندین بە هەڵوێستی نەگۆڕی خۆمان کە ڕەتکردنەوەی پستگوێخستنی ئیرادەی زۆرینەیە، پێمان وایە ڕاستکردنەوەی ڕێبازەکە بە ڕێزگرتن لە شایستەبوون و هاوسەنگیەکانەوە دەست پێدەکات، دوور لە سیاسەتی پەراوێزخستن و پێداگری لەسەر پشتگوێخستنی واقیعی سیاسی و یاسایی.