عێراق کاریگەرییەکانی کەمیی هاوردەکردنی غازی ئێران  تاوتوێ دەکات

ئاڤا نیوز

بەمەبەستی دەستەبەرکردنی کارەبا بۆ هاوینی داهاتوو، ئەنجوومەنی ئابووریی وەزاری عێراق کۆبووە و داوای پلانی هەردوو وەزارەتی کارەبا و نەوت دەکات.

وێنە گەورەکە: دوای ئەوەی ئەمریکا کۆتایی بە بڕیاری لێخۆشبوونی کڕینی کارەبا و غازی ئێران لەلایەن عێراقەوە هێنا کە پێشتر وەک ئاسانکارییەک بۆ عێراق دەریکردبوو تاوەکو بتوانێت بەشێک لە پێداویستییەکانی کارەبای پێ دابین بکات، ئەگەری کەمبوونەوەی دابەشکردنی کارەبای نیشتمانی لە وەرزی هاوینی ئەمساڵدا بەرز دەکاتەوە.

چیرۆکی سەرەکی: ئەمڕۆ دووشەممە 24-3-2025، فوئاد حسێن، جێگری سەرۆکوەزیران و وەزیری دەرەوە، سەرپەرشتی کۆبوونەوەی دانیشتنی دەیەمی ئەنجوومەنی ئابوری وەزاری کرد، بە ئامادەبوونی هەریەکە لە وەزیرانی  پلاندانان، دارایی، بازرگانی، کشتوکاڵ، پارێزگاری بانکی ناوەندی، سەرۆکی دەستەی دراو و جێگری سەرۆکی دەستەی وەبەرهێنانی نیشتمانی.

ڕاگەیێنراوی فەرمی: ئەنجوومەنی ئابوری وەزاری بەیاننامەیەکی بڵاوکردەوە و ڕایگەیاند: بە میوانداری یاریدەدەری وەزیری کارەبا بۆ کاروباری بەرهەمهێنان، ئەنجوومەنی ئابووری وەزاری تاوتوێی پلانی وەزارەتی کارەبای بۆ هاوینی داهاتوو و کاردانەوەی کەمی هاوردەکردنی غازی ئێرانی کرد.

- بۆ جێگرەوەی غازی ئێران، ئەنجوومەنی ئابوری وەزاری باسی لەو میکانیزم ڕێوشوێنانە کرد کە هەردوو وەزارەتی کارەبا و نەوت دەیگرنەبەر بۆ بەردەوامیی دابینکردنی وزەی کارەبا.

- پێویستی پرسی بەرهەمهێنانی وزە لە ڕێگەی سیستەمی وزەی خۆرەوە بۆ ماڵان و شوێنە بازرگانییەکان ڕەچاو بکرێت و هاندانی ئەم جۆرە پڕۆژانەش بدرێت.