ترەمپ بۆ ئێران: دانوستان یان جەنگ

 

ئاڤا نیوز

ترەمپ هەڕەشە لە ئێران دەکات و دەڵێت ئەگەر ئەو وڵاتە بە ڕێککەوتن ڕازی نەبێت، دۆخێکی خراپ ڕووی تێدەکات، ئەمەش ڕۆژێک دوای ئەوەی تاران ڕایگەیاند وەڵامی نامەیەکی سەرۆکی ئەمریکای داوەتەوە کە داوای گفتوگۆی کردووە.

وێنە گەورەکە: بە نێوەندگیری عومان گفتوگۆ ناڕاستەوخۆکانی ئەمریکا و ئێران دەستیپێکردووە و ئەمریکا دەیەوێت لە ژێر زۆرترین فشاردا کە بەسەر ئەو وڵاتەیدا سەپاندووە، ئێران بهێنێتە سەر مێزی گفتوگۆ، ئێرانیش ڕەتیدەکاتەوە لە ژێر فشاردا دانوستانی ڕاستەوخۆ بکات.

لێدوانی فەرمی: دۆناڵد ترەمپ، سەرۆکی ئەمریکا ڕایگەیاند، خواستێکی گەورەی هەیە و دەیەوێت لەگەڵ ئێران بگەنە چارەسەر، بەڵام ئەگەر نەگەنە چارەسەر، شتگەلێکی خراپ بەسەر ئێراندا دێت.

لە لایەکی دیکەوە: عەباس عێراقچی، وەزیری دەرەوەی ئێران، ڕایگەیاند لە نامەیەکدا بە فەرمیی وەڵامی نامەکەی ترەمپیان داوەتەوە کە بۆ ئێرانی ناردبوو و هەڵوێستی خۆیان لەسەر دۆخی ناوچەکە خستووەتەڕوو.