کۆمیسیۆنی هەڵبژاردنەکانی عێراق ئاماری نوێکردنەوەی تۆماری بایۆمەتری ئاشکرا دەکات

ئاڤا نیوز

لە چوارچێوەی ئامادەکارییەکان بۆ هەڵبژاردنی پەرلەمانی عێراق، کۆمیسیۆنی هەڵبژاردنەکانی عێراق ئاماری نوێکردنەوەی تۆماری بایۆمەتری بۆ ئاڤا ئاشکراکرد.

چیرۆکی سەرەکی: دوای ئەوەی ئەنجوومەنی وەزیرانی عێراق 11-11-2025 دیاریکرد بۆ بەڕێوەچوونی هەڵبژاردنی خولی شەشەمی پەرلەمانی عێراق، کۆمیسیۆنی باڵای هەڵبژاردنەکان ئامادەیی خۆی بۆ بەڕێوەبردنی دەربڕی، پاڵپشت بە یاسای هەڵبژاردنەکانی ژمارە 12ـی ساڵی 2018 کە عێراق بەسەر 18 بازنەی هەڵبژاردن دابەش دەکات.

لێدوانی فەرمی: جومانە غەلای، گوتەبێژی کۆمیسیۆنی باڵای سەربەخۆی هەڵبژاردنەکانی عێراق بە ئاڤا میدیای ڕاگەیاند: لە 25-3-2025 تاوەکو ئەمڕۆ 140 هەزار و 370 دەنگدەر تۆماری کارتەکانیان نوێکردووەتەوە.

- لەدایکبووانی ساڵی 2007 ژمارەیان تاوەکو 9-4-2025 گەیشتووەتە حەوت هەزار و 122 دەنگدەر.

- کۆی گشتی کارتی دابەشکراو تاوەکو 9-4-2025 گەیشتووەتە 17 ملیۆن و 999 هەزار و 283 کارتی بایۆمەتری.