شەپۆلێکی خۆڵبارین چەند پارێزگایەکی عێراق دەگرێتەوە

 

ئاڤا نیوز

شەپۆلێکی خۆڵبارین چەند پارێزگایەکی عێراقی گرتووەتەوە، پێشبینی دەکرێت بۆ ماوەی چەند ڕۆژێک بەردەوام بێت و دەستەی کەشناسیی عێراقیش هۆشداری ده‌دات.

وێنە گەورەکە: عێراق یه‌كێكه‌ له‌و وڵاتانه‌ی زۆرترین زیانی گۆڕانکاری کەشوهەوای بەرکەوتووە، بەو هۆیەشەوە ساڵانە خۆڵبارینی چڕ ڕوو لەزۆربه‌ی پارێزگاکانی ناوەڕاست و باشوور دەکات.

زانیاری بەدەستهاتوو: بەپێی میدیا عێراقییەکان، لەپاشنیوەڕۆی ئەمڕۆ دووشەممەوە شەپۆلێکی چڕی خۆڵبارین کە بە زریانی "سوور" ناسراوە، هەریەکە لە پارێزگاکانی نەجەف و موسەننا و دیوانییەی گرتەوە.

لە لایەکی دیکەوە: دەستەی کەشناسیی عێراق هۆشداری دا بە کەمبوونەوەی مەودای بینین لەو پارێزگایەنە، بەتایبەتی ڕیگاکانی نێوان سەنتەری شارەکان و قەزا و ناحییەکانی دەورووبەری.

ئەمەش بزانە: لە بودجەی 2024، بڕی 10 ملیار و 800 ملیۆن دینار بۆ پاڵپشتی کەرتی ژینگە ته‌رخانكراوه‌  و بەسەر وەزارەتەکانی نەوت، کارەبا و ژینگەدا دابەشکراون .