لە کەمپی هۆل 241 خێزانی دیکەی چەکدارانی داعش دەگوازرێنەوە عێراق

ئاڤا نیوز

پرۆسەی گەڕاندنەوەی خێزان و منداڵانی چەکدارانی داعش لە سووریا بۆ عێراق بەردەوامە و ئەمڕۆ 241 خێزانی دیکە لە کەمپی هۆلەوە بەرەو عێراق بەڕێکران.

چیرۆکی سەرەکی: کەمپی هۆل دەکەوێتە پارێزگای حەسەکە لە ڕۆژئاوای کوردستان و ئیدارەی خۆبەڕێوەبەری سووریا (خۆسەر) سەرپەرشتی دەکات، نزیکەی 43 هەزار چەکداری پێشوو و ژن و منداڵی ئەندامانی داعش لەو کەمپە کۆکراونەتەوە، 18 هەزاریان عێراقین، بەغداش جەخت لە گەڕانەوەی هەموویان دەکاتەوە.

لێدوانی فەرمی: شوکری حەجی، بەرپرسی نووسینگەی دەرچوون لە کەمپی هۆل بە میدیای عێراقی ڕاگەیاند، لەمساڵدا ئەمە کاروانی هەشتەمینە دەگەڕێنەوە عێراق، ژمارەشیان 241 خێزانە و لە 865 کەس پێکهاتوون.

شێوازی جێبەجێکردن: بەگوێرەی وتەکانی شوکری حەجی، بەرەبەیانی ئەمڕۆ ئەم 241 خێزانە لە ڕێگەی نزیکەی 20 پاسەوە لەژێر چاودێری هێزەکانی ئەمریکا لەڕێگەی دەروازەی سنووری یەعربیە لە ڕۆژهەڵاتی حەسەکە گەیشتنە عێراق.

ئەوەی پێویستە بیزانیت: بەگوێرەی ئامارەکانی وەزارەتی کۆچ و کۆچبەرانی عێراق، زیاتر لە 14 هەزار کەس لە ژن و منداڵی چەکدارانی داعش لە ماوەی چوار ساڵی ڕابردوو لە کەمپی هۆلەوە گواستراونەتەوە عێراق و پرۆسەکەش بەردەوامە.