پایتەختی نوێی ئیداری عێراق بەکوێ گەیشت؟

ئاڤا نیوز

پڕۆژەی پایتەختی نوێی ئیداری عێراق لە باشووری بەغدا، دوای نۆ ساڵ لە گفتوگۆو تاوتوێکردنی تائێستا تەنیا لە چوارچێوەی بیرۆکەدا ماوەتەوە، بەڵام پەرلەمانتارێک دەڵێت، بەمزووانە حکومەت پڕۆژەکە زیندوو دەکاتەوە و دەست بە جێبەجێکردنی دەکات.

چیرۆکی سەرەکی: بۆ کەمکردنەوەی قەرەباڵغی شەقامەکانی بەغدا و بردنەدەرەوەی وەزارەت و دامەزراوەکان، لە ساڵی 2016ـەوە بیرۆکەی دروستکردنی شارێکی نوێی ئیداریی لە باشوور بەغدا و لەسەر ڕێگەی بەغدا - بەسڕە خرایەڕوو، تێچووی دروستکردنی پڕۆژەکەش بە 50 مليار دۆلار خەمڵێنراوە.

لێدوانی فەرمی: حەسەن خەفاجی، ئەندامی پەرلەمانی عێراق ڕایگەیاند، بەگوێرەی ئاماری هاتووچۆ 40%ـی قەرەباڵغی شەقامەکانی بەغدا هۆکارەکەی گواستنەوەی فەرمانبەر و ئەو کەسانەیە کە کاریان لە وەزارەتەکان هەیە، بۆیەش پلانێکی حکومیی بۆ دروستکردنی پایتەختی ئیداریی لە باشووریی بەغدا هەیە و بەمزووانە ڕادەگەیێنرێت.

لە لایەکی دیکەوە: نەبیل سەفار، وتەبێژی وەزارەتی ئاوەدانکردنەوەی عێراق دەڵێت، گواستنەوەی وەزارەتەکان لە شوێنی ئێستایانەوە بۆ شوێنێکی دیکە پێویستی بە بودجەیەکی گەورەیە هەیە، جەختیش دەکاتەوە کە وەزارەتەکەیان لە پڕۆژەی شاری نەهرەوان تاوتوێی ئەوە دەکات 50 دۆنم زەوی بۆ هەر وەزارەتێک تەرخان بکات، بەڵام کاری لەپێشینەشیان داوە بە دروستکردنی یەکەکانی نیشتەجێبوون نەک شوێنی وەزارەتەکان.