پڕۆژەی ئاوی قوشتەپە 25%ی کارەکانی تەواو بووە

ئاڤا نیوز

 

کارکردن لە پرۆژەی ئاوی قوشتەپە کە زیاتر 51 هەزار هاووڵاتی ناوچەکە و بێستانە و 72 گوند لێی سوودمەند دەبن بەردەوامە. 

 

وێنە گەورەکە: ڕۆژی 17-9-2024، سەرۆکوەزیران مەسرور بارزانی، بەردی بناغەی پڕۆژەی ئاوی قوشتەپەی بە گوژمەی 189 ملیار و 670 ملیۆن دینار دانا، پرۆژەکە سێ کۆگای هەیە بە قەبارەی 5 هەزار مەتر سێجای، بۆرییەکەی 38 کیلۆمەتر درێژە بە تیرەی 900 ملیمەتر، بۆ بەستنەوەی بە تۆڕی ئاوی قوشتەپە 80 هەزار مەتر بۆری پێویستە.

 

لێدوانی فەرمی: ڕێزان سەعدی، بەڕێوبەری ئاوی دەورووبەری هەولێر بە ئاڤا میدیای ڕاگەیاند: کارکردن لە پرۆژەکە بەردەوامە، لە بەشەکانی هێڵی گواستنەوە و خەزانەکان و بەشەکانی دیکەی پرۆژەکە قۆناغی باشی بڕیوە و زیاتر لە %25ـی پرۆژەکە تەواوا کراوە.

 

بۆچی گرنگە: وێڕای چارەسەرکردنی گرفتی کەمئاوی لە ناوچەکە بۆ چەندین ساڵی داهاتوو، پرۆژەکە گرفتی ئاوی ژێر زەویش چارەسەر دەکات. لە ساڵانی ڕابردوو قەزای قوشتەپە کەمترین ئاستی ئاوی ژێر زەوی لێ تۆمارکراوە، بەجۆرێک لە هەندێک ناوچە قووڵی لێدانی بیر گەیشتووەتە 650 مەتر، بەمەش پرۆژەکە کاریگەریی ڕاستەخۆی لەسەر بووژانەوەی ئاوی ژێر زەوی دەبێت.