سوپاکانی هیندستان و پاکستان دەخرێنە حاڵەتی ئامادەباشییەوە

ئاڤا نیوز

 

ڕووبەڕووبوونەوەی سەربازی لەسەر سنووری نێوان هیندستان و پاکستان بەردەوامە و وەزارەتی بەرگری هەردوو دەوڵەتیش سوپا دەخەنە حاڵەتی ئامادەباشی جەنگەوە.

وێنە گەورەکە: سەرەڕای هەوڵە دیپلۆماسی و نێودەوڵەتییەکان بۆ ڕێگریکردن لە هەڵگیرسانی جەنگ، ناکۆکیەکانی نێوان هیندستان و پاکستان بەرەو تەشەنەسەندنی زیاتر هەنگاو دەنێت و پێکدادان و ڕووبەڕووبوونەوەی سەربازی بە درێژایی 740 کیلۆمەتر سنووری هاوبەش لە نێوان هەردوو دەوڵەت لە ماوەی سێ ڕۆژی ڕابردوودا ڕوویداوە و سوپای هیندستان بەرپەرچدانەوەی چەند هێرشێکی چەکداری ڕاگەیاند.

بڵاوکراوەی فەرمی: سوپای هیندستان لە بڵاوکراوەیەکی فەرمیدا ڕایگەیاند، بە درێژایی سنوری نێوان هیندستان و پاکستان لە چەند ناوچەیەکی جیاوازی سەربازیەوە بە چەکی بچوک هێرش کراوەتە سەر وسەربازانی هیندستان و لە لایەن سوپاوە وەڵامدراونەتەوە، ئەم هێرشانە بە دریژایی سێ رۆژی ڕابردوو بونیان هەبووە و تاوەکو بەرەبەیانی ئەمڕۆش بەردەوام بووە، سوپا بە تەواوی لە حاڵەتی ئامادەباشیدایە بۆ هەر هێرش و جەنگێک.

لەلایەکی دیکەوە: پاکستان بێئاگایی و بێبەریبوونی خۆی لە هێرشەکەی سێشەممەی ڕابردوو 22 – 4 – 2025 ڕاگەیاند کە لە هێرشێکی چەکداریدا بۆ سەر هەرێمی کشمیر لە خاکی هیندستان 26 کەس کوژران، ئەم کارە و هەنگاوەکانی هیندستانی دژ بە پاکستان بە پیلانگێڕی بۆ هەڵگیرسانی جەنگ ناوزەند کرد، سوپای پاکستانیش ئامادەیی بۆ جەنگ ڕاگەیاند.

ئەوەی پێویستە بیزانیت: هەوڵە نێودەوڵەتیەکان بۆ چارەسەرکردنی ناکۆکیەکانی نێوان هیندستان و پاکستان بەردەوامی هەیە و دەوڵەتان داوا دەکەن کێشەکان بە ڕێگەی دیپلۆماسی چارەسەر بکەن، ئێرانیش وەک یەکەم دەوڵەت ئامادەیی خۆی بۆ ئەنجامدانی نێوەندگیری دەربڕی.