دانیشتووانی خورماڵ بەهۆی یەکلانەبوونەوەی قایمقام تووڕە و نیگەرانن

ئاڤا نیوز

پۆستی قایمقامییەتی قەزای خورماڵ تاوەکو ئێستا بە بەتاڵی ماوەتەوە و خەڵکی قەزاکەش نیگەران و تووڕەن.

وێنە گەورەکە: نزیکەی ساڵێک بەسەر دەرچوونی بڕیاری بەقەزابوونی خورماڵ تێدەپەڕێت، هێشتا ڕێککارە کارگێڕییەکانی بە قەزابوونی تەواو نەکراوە و پۆستی قایمقامیش بە بەتاڵی ماوەتەوە.

زانیاریی پەیامنێر: ئاراس ڕەفیق، پەیامنێری ئاڤا لە هەڵەبجە ڕایگەیاند، لەبەرئەوەی پارتی یەکێک لە سێ کورسییەکانی هەڵەبجەی لە هەڵبژاردنی پەرلەمانی هەرێمی کوردستان بەدەستهێناوە، پۆستی قایمقامییەتی خورماڵ بە مافی خۆی دەزانێت و بەشێک لە خەڵکی قەزاکەش داوا دەکەن کەسێکی پارتی بکرێتە قایقام، بۆ ئەوەی خزمەتیان بکات.

لێدوانی فەرمی: نوخشە ناسیح، پارێزگاری هەڵەبجە بە ئاڤای ڕاگەیاندووە: لە کۆتایی مانگی نیسان و سەرەتای مانگی ئایار ئەم بابەتە یەکلایی دەبێتەوە و کەسێک وەکو قایقام دەستنیشان دەکرێت.

لەلایەکی دیکەوە: دانیشتووانی خورماڵ تووڕە و نیگەرانن؛ کاک ئەمین حاجی چالاکوانێکی دانیشتووی خورماڵە دەڵێت: ئەگەر زوو قایمقامێکمان بۆ دانەنێن، مانگرتن ڕادەگەیێنین و لەناوەڕاستی بازاڕی خورماڵ خێمە هەڵدەدەین.

بەتەنیشت ئەم بابەتەوە: فەرەیدوون مەحموود، بەڕێوبەری ئێستای ناحیەی خورماڵ ڕایگەیاندووە، بەپێی یاسا پۆستی قایمقام دەبێت بە وەکالەت دابنرێت هەتا کابینەی نوێی حکومەت پێکدەهێندرێت. هەروەها دەشڵێت، "من بەهێزترین کاندیدم بۆ وەرگرتنی پۆستی قایمقام".

باکگراوند: دوای ئەوەی سەرۆکوەزیران، مەسرور بارزانی لە ڕێکەوتی 30ی تەممووزی 2023، بڕیاری بەقەزاکردنی ناحیەی خورماڵی لە پارێزگای هەڵەبجە دەرکرد، ڕۆژی 9ی ئایاری 2024 نێچیرڤان بارزانی، سه‌رۆکی هه‌رێمی کوردستان، پاڵپشت به‌ یاسای سه‌رۆکایه‌تیی هه‌رێمی کوردستان، ژماره‌ یەکی ساڵی 2005ی هه‌موارکراو له‌به‌ر ڕۆشناییی داواکاریی ئه‌نجوومه‌نی وه‌زیرانی هه‌رێمی کوردستان، بڕیاری دا به‌ هێنانه‌کایه‌ی قه‌زای خورماڵ له‌ سنووری پارێزگای هه‌ڵه‌بجه‌ به‌ هه‌مان سنووری ناحیه‌ی خورماڵ.