قوباد تاڵەبانی داوای دەستپێكردنەوەی گەشتە ئاسمانییەكانی توركیا - سلێمانی دەكات

ئاڤا نیوز

قوباد تاڵەبانی، جێگری سەرۆكوەزیرانی هەرێمی كوردستان داوا لە بەرپرسانی كۆمپانیای توركش ئێرلاین دەكات گەشتە ئاسمانییەكانی توركیا لە فڕۆكەخانەی سلێمانی دەست پێ بكاتەوە.

زانیاریی بەدەستهاتوو: ئەمڕۆ سێشەممە 6-5-2025، لە پەراوێزی بەشداریكردنی لە پێشەنگای گەشتوگوزاری میتێكس2025، قوباد تاڵەبانی جێگری سەرۆكوەزیرانی هەرێمی كوردستان چووە لای كۆمپانیای توركش ئێرلاین بۆ گواستنەوەی ئاسمانی و بە یەكێك لە بەڕێوەبەرەكانی كۆمپانیاكەی گوت دەست بە گەشتە ئاسمانییەكانتان لە فڕۆكەخانەی سلێمانی بكەنەوە.

ئەوەی پێویستە بیزانیت: توركیا لە 3ی نیسانی ساڵی 2023 گەشتی ئاسمانییەكانی لەگەڵ فڕۆكەخانەی سلێمانی ڕاگرت و هۆكارەكەیشی بۆ ئەوە گەڕاندەوە، گوایا پەكەكە دزەی كردۆتە نێو فڕۆكەخانەكە و هەڕەشەیە بۆ سەر ئاسایشی گەشتە ئاسمانییەكان و تاوەكو ئێستا چەند جارێك ماوەی ڕاگرتنەكە درێژ كراوەتەوە و دوای درێژكردنەوەش تاوەكو 7ی6ی ئەمساڵە و نازانرێت دوای ئەو وادەیە بڕیاری توركیا چی دەبێت.