مارکۆ ڕۆبیۆ: دەبێت بە زووترین کات هیندستان و پاکستان کۆتایی بەم دۆخە بهێنن

ئاڤا نیوز

وەزیری دەرەوەی ئەمریکا داوا لە بەرپرسانی هیندستان و پاکستان دەکات بە زووترین کات ڕێگەچارەیەک بۆ دۆخی ئێستای نێوانیان بدۆزنەوە.

وێنە گەورەکە: شەوی ڕابردوو ناکۆکی و گرژیەکانی نێوان هیندستان و پاکستان پێی نایە قۆناغیکی مەترسیدار و هەردوو دەوڵەت چەند پێگەیەکیان لە خاکی یەکتر کردە ئامانج، هیندستان هێرشی دەستپێکرد و پاکستان وەڵامی دایەوە و دەیان قوربانی لێکەوتەکانی هێرشی هەردوو وڵات بوون بۆسەر یەکتر، هەوڵە نێودەوڵەتییەکان بۆ ڕاگرتنی گرژی و ناکۆکییەکان بەردەوامە، وەزیری دەرەوەی ئەمریکا داوای دۆزینەوەی ڕێگەچارەی خێرا لە هیندستان و پاکستان دەکات.

ڕاگەیێنراوی فەرمی: مارکۆ ڕۆبیۆ، وەزیری دەرەوەی ئەمریکا لە ئەکاونتی تایبەتی خۆی لە پلاتفۆرمی ئێکس ڕایگەیاند، لە نزیکەوە چاودێری دۆخی نێوان پاکستان و هیندستان دەکات، لە پێناو کۆتایهێنان بە دۆخی ئێستا پێویستە بە زووترین کات سەرکردایەتی هەردوو دەوڵەت پێکەوە کار بکەن، بۆ دۆزینەوەی ڕێگەچارەیەکی گونجاو بۆ چارەسەرکردنی ناکۆکییەکان و ڕێگریکردن لە تەشەنەسەندنی گرژییەکان.

باکگراوند: 22-4-2025، لە هێرشی گرووپێکی چەکداریدا بۆ سەر هەرێمی کشمیر لە خاکی هیندستان 26 کەس کوژران، ئەم ڕووداوە جارێکی دیکە ناکۆکی لە مێژینەی نێوان پاکستان و هیندستانی زیندوو کردەوە و هەردوو وڵات هەموو پەیوەندییە دیپلۆماسییەکانیان پچڕاند،  ئێستا دۆخی هەردوو وڵات لە حاڵەتی ئامادەباشیدایە بۆ جەنگ و هەنگاو بەرەو جەنگێکی گەورەی مەترسیدار دەنێن.