لەنێوان ئیتاڵیا و یۆنان 43 كۆچبەری كورد گیریان خواردووە

ئاڤا نیوز

بەلەمێكی كۆچبەران بە 75 سەرنشینەوە لە ناوچەی ئاوی ئازادی نێوان ئیتاڵیا و یۆنان گیری خواردووە كە زۆربەی سەرنشینانی كوردن و داوا دەكەن لایەنە فەرمییەكان بە هانایانەوە بچن.

چیرۆكی سەرەكی: كەسوكاری ژمارەیەك كۆچبەری كورد هانایان بۆ ڕێكخراو و چالاكوانانی داكۆكیكار لە مافی پەنابەران بردووە، بەوەی كە ماوەی زیاتر لە 48 كاتژمێرە، لە ناوچەی ئاوی ئازاد لە كەناراوەكانی نێوان ئیتاڵیا و یۆنان گیریان خواردووە، دوای ئەوەی هەوڵیان داوە بە قاچاخ بگەنە ئیتاڵیا، بەڵام بەهۆی شەپۆڵی توندی دەریایی، بەلەمەكەیان لە جووڵە دەكەوێت و ناتوانن لە ڕۆیشتن بەردەوام بن.

لێدوانی فەرمی: ڕەنج پشدەری، چالاكوانی كاروباری پەنابەران لە ئەوروپا تایبەت بە ئاڤا ڕایگەیاند: كۆی ئەو كۆچبەرانەی لەنێو بەلەمەكە گیریان خواردووە ژمارەیان 75 كۆچبەرە كە 43 لەو كۆچبەرانە كوردن؛ 23 كەسیان دانیشتووی ڕۆژهەڵاتی كوردستان و 20 كەسیشیان خەڵكی هەرێمی كوردستانن، سێ ڕۆژ و دوو شەوە لە ئاودا گیریان خواردووە و داوا دەكەن هێزی فریاكەوتنی ئیتاڵیا بەدەنگیانەوە بچێت.

ئەوەی پێویستە بیزانیت: بەهۆی ئەوەی لە ناوچەی ئاوی ئازادن، ئیتاڵیا دەڵێت هیچ پەیوەندییەكی بە ئەوانەوە نییە و ناچێت بەدەمیانەوە، پۆلیسی ئیتاڵیا چاوەڕوانی ئەوەن؛ ڕێكخراوەكانی داكۆكیكار لە مافی پەنابەران داوا لە وڵاتی ئیتاڵیا یاخود یۆنان بكەن بەدەنگیانەوە بچن و ڕزگاریان بكەن، یاخود كەشتییەكی بارهەڵگر بە نزیكیانەوە بچێت و هەڵیان بگرێت.