فایلی خەڵک؛ شارەوانی بەڵێنی چارەسەر بۆ کێشەی گەڕەکێک لە دۆمێز دەدات

ئاڤا نیوز

گەڕەکێکی کۆمەڵگەی دۆمێز لە ناحیەی فایدە زیاتر لە 200 ماڵی تێدا نیشتەجێیە، بە دەست نەبوونی ئاوەڕۆ و خراپی شەقامەکانیان دەناڵێنن، سەرۆکی شارەوانی ناحیەکەش دەڵێت کێشەکانیان چارەسەر دەکەین.

چیرۆکی سەرەکی: گەڕەکی پاقلاوە لە کۆمەڵگەی دۆمێزی سەر بە ناحیەی فایدە لە دهۆک، نزیکەی 250 ماڵی تێدایە. گەڕەکەکە نوێیە و تەنیا 200 مەتر لە باڵەخانەی ناحیەکە دوورە، کەچی کەس بە هانایانەوە ناچێت، شەقامەکانیان خراپ بووە، ئاوەڕۆیان نییە. 

زانیاریی زیاتر: بڕیار بوو لە سالی 2024 بەگوژمەی نزیکەی ملیارێک دینار گەڕەکەکە هەمووی قیرتاو بکرێت، بەڵام جێبەجێ نەکرا.

لێدوانی فەرمی: محەممەد رەمەزان، سەرۆکی شارەوانی ناحیەی فایدە بە ئاڤای وت، خزمەتگوزاری ئەم گەڕەکەمان خستووەتە پلانی پڕۆژەکانی 2025. ئێمە دڵنیاین بۆ ئەمساڵ شەقامەکە هەمووی قیرتاو دەکرێت کە نزیکەی سێ کیلۆمەتر دەبێت.