کۆمسیۆن وادەی پێشکەشکردنی لیستی بەربژێران دیاری دەکات

ئاڤا نیوز

کۆمسیۆنی باڵای سەربەخۆی هەڵبژاردنەکانی عێراق وادەی پێشکەشکردنی لیستی كاندیدان و بەربژێرانی بۆ هەڵبژاردنی پەرلەمانی عێراق دیاری کرد و تا رۆژی 24ـی حوزەیران بەردەوام دەبێت.

وێنە گەورەکە: دوای ئەوەی ئەنجوومەنی وەزیرانی عێراق 11-11-2025ی دیاریکرد بۆ بەڕێوەچونی هەڵبژاردنی خولی شەشەمی پەرلەمانی عێراق، کۆمیسیۆنی باڵای هەڵبژاردنەکان ئامادەیی خۆی بۆ بەڕێوەبردنی دەربڕی، پاڵپشت بە یاسای هەڵبژاردنەکانی ژمارە 12ـی ساڵی 2018 کە عێراق بەسەر 18 بازنەی هەڵبژاردن دابەش دەکات.

ڕاگەیێنراوی فەرمی: کۆمسیۆنی باڵای سەربەخۆی هەڵبژاردنەکانی عێراق بڕیاریدا، لە 25-5-2025 دەرگای پێشكەشكردنی لیستی كاندیدەکان و بەربژێران بۆ هەڵبژاردنی پەرلەمانی عێراق بكاتەوە و تا رۆژی 24-6-2025 بەردەوام دەبێت.

- هەموو حیزب و لایەنەکان و بەربژێرانی سەربەخۆ بۆ خۆتۆمارکردن و پێشکەشکردنی لیستی بەربژێرانیان دەتوانن لەو ماوەیەدا سەردانی کۆمسیۆنی باڵای هەڵبژاردنەکانی عێراق بکەن.

ئەوەی پێویستە بیزانیت: بەپێی ڕێنماییەکانی کۆمسیۆنی باڵای هەڵبژاردنەکانی عێراق، پێویستە سەرۆكی هەر حیزب و لایەنێک یاخود سەرۆكی هەر لیستێک لە كاتی پێشكەشکردنی ناوی کاندیدەکانیان ئامادەبێت و واژۆ لەسەر لیستەكە بکات، هەر حیزب و لایەنێکیش بیەوێت لە هاوپەیمانییەك جیابێتەوە، دەبێت لەو ماوەیەدا و پێش 24-6-2025 جیابوونەوەی خۆی ڕابگەیەنێت .