کرێملن مەرج بۆ دیداری نێوان پووتین و زێلێنسکی دادەنێت

ئاڤا نیوز

 

کۆشكی سەرۆکایەتیی ڕووسیا 'کرێملن' کۆبوونەوەی نێوان پووتین و زێلێنسکی، دەبەستێتەوە بە ڕێککەوتنی نێوان مۆسکۆ و کیێڤ.

 

لێدوانی فەرمی: دیمیتری پیسکۆف، وتەبێژی کرێملن ڕایگەیاند: ئەگەری هەیە ڤلادمێر پووتین، سەرۆکی ڕووسیا و ڤۆلۆدمێر زێلێنسکی، سەرۆکی ئۆکراینا لەگەڵ یەک کۆببنەوە، بەڵام ئەوە پەیوەست و مەرجدارە بەوەی شاندی دانوستاندنکاری ڕووسیا و ئۆکراینا بگەنە ڕێککەوتن.

 

ئەوەی پێویستە بیزانیت: ڕۆژی هەینی 16-5-2025، یەکەم دانوستاندنی ڕاستەوخۆ دوای سێ ساڵ لە دەستپێکی شەڕ، لە نێوان ڕووسیا و ئۆکراینا لە ئیستەنبووڵ بە ئامادەبوونی هاکان فیدان، وەزیری دەرەوەی تورکیا کۆتایی هات، هەردوولا دەرئەنجامەکانیان بە "بەرهەمدار و ئەرێنی" وەسف کرد.

 

لەلایەکی دیکە: لەبارەی کۆبوونەوەکان، لایەنی ڕووسی ئاشکرای کرد لەگەڵ ئۆکراینا بەردەوام دەبن لە دانوستاندن و لایەنی ئۆکراینیش ئاماژەی بەوەکرد، ڕاگەیاندنی ئاگربەست بۆ وەستاندنی جەنگ لەمیانی دانوستاندنەکاندا تاوتوێ کرا.