میری قەتەر "نامەیەک" دەگەیێنێتە سوودانی

ئاڤا نیوز

میری قەتەر بەر لە کۆتاییهاتنی کارەکانی لووتکەی عەرەبی، بەغدای بەجێهێشت و لە کۆبوونەوەشیدا لەگەڵ سەرۆکوەزیرانی عێراق، هەڵوێستی وڵاتانی کەنداوی لەبارەی عێراق خستووەتەڕوو.

چیرۆکی سەرەکی: تەمیم بن حەمەد ئەلسانی، میری قەتەر بەیانی ئەمڕۆ شەممە بەمەبەستی بەشداریکردن لە لووتکەی عەرەبی سەردانی بەغدای کرد، لە لووتکەکەشدا لەکۆی 22 وڵات تەنیا پێنج وڵات لە ئاستی کەسی یەکەم بەشداربوون.

لێدوانی فەرمی: میری قەتەر بەر لەکۆتاییهاتنی کارەکانی لووتکەی عەرەبی، کۆبوونەوەیەکی دوو قۆڵی لەگەڵ محەممەد شیاع سوودانی، سەرۆکوەزیرانی عێراق کرد و دواتریش بەغدای بەجێهێشت. لە پەیامێکیشدا ڕایگەیاند، دەستخۆشی لە عێراق دەکات بۆ ڕێکخستنی لووتکەکە و ئەو بڕیارانەی تییدا دەدرێن بۆ بەهێزکردنی هاوبەشیی، پەیوەندی نێوان وڵاتان و ئاسایش و ئارامی ناوچەکە.

زانیاریی زیاتر: سەرچاوەیەکی ئاگادار بە میدیاکانی عێراقی ڕاگەیاندووە، لە کۆبوونەوەکەی نێوان میری قەتەر و سەرۆکوەزیرانی عێراق، سەرنج خراوەتەسەر دەرئەنجامی کۆبوونەوەی لووتکەی کەنداو و سەرۆکی ئەمریکا و ئەو بابەتانەی تێیدا باسکراون، هاوکات میری قەتەر نامەیەکیشی گەیاندووەتە سوودانی کە تێیدا هەڵوێستی وڵاتانی کەنداو لەسەر عێراق و چۆنیەتی مامەڵەکردن لەگەڵ نێوەندگیری ئەو وڵاتە لە گفتوگۆکانی نێوان واشنتن و تارانی تێدا ڕوونکراوەتەوە.