سەرۆکوەزیران مەسرور بارزانی گەیشتە واشنتن

ئاڤا نیوز

سەرۆکوەزیران مەسرور بارزانی گەیشتە واشنتنی ئەمریکا و زنجیرەیەک دیدار و کۆبوونەوەی لەگەڵ بەرپرسانی باڵای ئەمریکا و کۆنگرێسی وڵاتەکە دەبێت.

چیرۆکی سەرەکی: ئەمڕۆ شەممە 17-5-2025، سەرۆکوەزیران مەسرور بارزانی بە سەردانێکی فەرمی و لەسەر بانگهێشتی حکومەتی ئەمریکا، بە سەرۆکایەتی شاندێکی باڵا گەیشتە واشنتن.

ڕاگەیێنراوی فەرمی: حکومەتی هەرێمی کوردستان بڵاویکردەوە، بڕیارە لەم سەردانەدا سەرۆکوەزیران،  زنجیرەیەک دیدار و کۆبوونەوە لەگەڵ بەرپرسانی باڵای حکومەتی ئەمریکا و کۆنگرێس ئەنجام بدات. هەروەها لەگەڵ وەبەرهێنەران و خاوەنکارانی ئەمەریکی گفتوگۆ لەبارەی پەرەپێدانی پەیوەندیی ئابووری و بازرگانی دەکات.

گۆشەیەکی دیکەی دیمەنەکە: تەوەرێکی سەرەکی گفتوگۆکانی سەرۆکوەزیران لەگەڵ بەرپرسانی ئەمەریکا، تایبەتە بە پتەوکردن و پەرەپێدانی زیاتری پەیوەندیی و هاوبەشی ستراتیژی نێوان هەرێمی کوردستان و ئەمریکا و تاوتوێکردنی دوایین گۆڕانکاری و پێشهاتەکانی دۆخی گشتیی عێراق و ناوچەکە.

زانیاریی زیاتر: سەرۆکوەزیران مەسرور بارزانی بەشداریی لە  گفتوگۆیەکی تایبەتی کۆڕبەندی وزە لە واشنتن دەکات بە ناونیشانی “داهاتووی وزە لە هەرێمی کوردستان”. کە ڕوانین و دیدگای هەرێمی کوردستان بۆ پەرەپێدانی کەرتی وزە دەخاتەڕوو و و تیشک دەخاتە سەر دەرفەتەکانی وەبەرهێنان لەم کەرتەدا.

باکگراوند: دوایین سەردانی سەرۆکوەزیران مەسرور بارزانی بۆ ئەمریکا، لە 2024-02-24 بوو، کە بە بانگهێشتی فەرمی گەیشتە واشنتنی پایتەختی ویلایەتە یەکگرتووەکانی ئەمریکا،

ئەمانە دیدار و کۆبوونەوەکانی سەرۆکوەزیرانن لە ئەمریکا:

٠ ڕۆژی 26-2-2024 سەرۆکوەزیران لەگەڵ ئەنتۆنی بلینکن، وەزیری دەرەوەی ئەمریکا کۆبوویەوە.

٠ هەمان ڕۆژ لەگەڵ باربارا لیف، یاریدەدەری وەزیری دەرەوەی ئەمریکا بۆ کاروباری ڕۆژهەڵاتی نزیک، عەزا زیبا، بریکاری وەزارەتی دەرەوە بۆ کاروباری ئاسایشی سڤیل و دیموکراسی و مافەکانی مرۆڤ، جیۆفری پیات، یاریدەدەری وەزیری دەرەوەی بۆ سوەرچاوەکانی وزە کۆبوویەوە.

٠ ڕۆژی 27-2-2024، لەگەڵ سیناتۆر جاک ڕید، سەرۆکی لیژنەی هێزە چەکدارەکانی ئەمریکا ئەنجوومەنی پیرانی ئەمریکا کۆبوویەوە.

٠ هەمان رۆژ سەرۆکوەزیران لەگەڵ ژمارەیەک لە دامەزراوە و پەیمانگەی سیاسەت و هزر و لێکۆڵینەوەی ئەمریکی کۆبوویەوە.

٠ رۆژی 28-2-2025، سەرۆکوەزیران لەگەڵ سیناتۆر تامی دەکوۆرت کۆبوویەوە.

٠ هەمان ڕۆژ لەگەڵ سیناتۆر لینزی گراهام کۆبوویەوە.

٠ دواتر لەگەڵ کۆنگرێسمان دۆن بەیکن کۆبوویەوە.

٠ ڕۆژی 29-2-2024، لەگەڵ ژمارەیەک ئەندامی کۆنگرێسی ئەمریکا کۆبوویەوە.

٠ ڕۆژی 29-2-2024، سەرۆکوەزیران لەگەڵ کۆنگرێسمان ماریۆ دیاز بالارت کۆبوویەوە.

٠ هەمان ڕۆژ لەگەڵ سیناتۆر کریس ڤان هۆڵن کۆبوویەوە.

٠ دواتر لەگەڵ کۆنگرێس ئەلیسا سلۆتکین کۆبوویەوە.

٠ دواتر سەرۆکوەزیران لە پنتاگۆن لەگەڵ ساشا بەیکەر، بریکاری وەزیری بەرگریی ئەمریکا کۆبوویەوە.

٠ سەرۆکوەزیران لەگەڵ جەیک سولیڤان، ڕاوێژکاری ئاسایشی نیشتمانی ئەمەریکا کۆبوویەوە.

٠ دواتر سەرۆکوەزیران چاوی بە برێت مەکگۆرک، هاوئاهەنگکاری کۆشکی سپی بۆ کاروباری ڕۆژهەڵاتی ناوەڕاست کۆبوویەوە.

٠ دواتر مەسرور بارزانی لەگەڵ ئامۆس هۆکستین، گەورە ڕاوێژکاری سەرۆکی ئەمریکا بۆ کاروباری وزە کۆبوویەوە.

٠ هەمان ڕۆژ ژووری بازرگانی ئەمریکا دیدارێکی بۆ پێشوازیکردن لە سەرۆکوەزیران مەسرور بارزانی ڕێکخست.

٠ دواتر ئەندامانی ئەنجوومەنی پیران و نوێنەرانی ئەمەریکا ئێوارەخوانێکیان بۆ پێشوازیکردن لە مەسرور بارزانی لەگەڵ ڕیکخست.

٠ ڕۆژی 1-3-2024، سەرۆکوەزیران مەسرور بارزانی لەگەڵ براین نیلسن، بریکاری وەزیری گەنجینەی ئەمریکا بۆ کاروباری پەیوەندیدار بە تیرۆر و هەواڵگری دارایی کۆبوویەوە.

٠ ڕۆژی 5-3-2024، سەرۆکوەزیران مەسرور بارزانی لەگەڵ جۆرج دەبلیۆ بۆش، سەرۆکی پێشووتری ئەمریکا کۆبوویەوە.

٠ ڕۆژی 7-3-2024، سەرۆکوەزیران مەسرور بارزانی گەڕایەوە هەولیری پایتەختی هەرێمی کوردستان.