د.عەبدوللەتیف سەلەفی ڕوونکردنەوە لەبارەی بڕیارێکی عێراقەوە دەدات

ئاڤا نیوز

 

دوای ئەوەی قاسم ئەعرەجی، ڕاوێژکاری ئاسایشی نیشتمانی نووسراوێکی بۆ سەرجەم پارێزگا سووننە نشینەکان ناردووە لەبارەی هۆشیارکردنەوەی خەڵکی لە چالاکی سەلەفییە مەدخەلییەکان و قەدەغەکردنی چالاکییەکانیان، د.عەبدوللەتیف سەلەفی ڕوونکردنەوەیەک لە ڕێگەی ئاڤاوە بڵاودەکاتەوە. 

چیرۆکی سەرەکی: حکومەتی عێراق بڕیاریداوە سەرجەم چالاکییەکانی سەلەفییە مەدخەلییەکان لە عێراق قەدەغە بکات و هەڵمەتێکیشی دەستپێکردووە بۆ هۆشیارکردنەوەی خەڵکی لەوبارەیەوە، چونکە بەمەترسی بۆسەر ئاسایشی نیشتمانی ناوزەندی کردوون.

 

لێدوانی فەرمی: د.عەبدوللەتیف ئەحمەد، ڕێبەری ڕەوتی سەلەفییەکانی کوردستان لەبارەی بڕیارەکەی حکومەتی عێراقەوە وەڵامی چەند پرسیارێکی ئاڤای داوەتەوە دەڵیت؛ من مەدخەلی نیم و ڕەخنەی زۆریشم لێیان هەیە، چونکە لە هەندێک بواردا لە سەلەفییەتی ڕاستەقینە لایانداوە.

 

- وتراوە کە بزووتنەوەیەکی تووندڕەون و هەڕەشەن لەسەر سەلامەتی کۆمەڵگە و ئاسایشی نەتەوەیی، بەڵام ئەو تۆمەتە ڕاست نییە، ئەوان لەگەڵ ئەمەن و ئاسایشی وڵاتدان و دژی بیری تووندڕەوی و ئاژاوەگێڕین. 

- پێویست بوو حکومەتی عێراق پشتیوانیان بکات، نەک دژایەتی، چونکە مەدخەلییەکان گوێڕایەڵی بڕیارەکانی کاربەدەستانی وڵاتن لە چاکەدا و نەیان وتووە کە دژایەتیی دەکەین. 

- مەدخەلییەکان تێکەڵ بەکاری سیاسی نین و حیزبایەتی ناکەن، کەواتە بێ کێشەن و سەرچاوەی ئاژاوە و ئاشووب نین. 

-ڕاستە کە هاوبیری سوننەکانی وڵاتانی کەنداون، بەڵام ئەوە ڕاست نییە کە سەر بەڕێکخستنی وڵاتانی دیکە بن، نەئەوەشە کە هاوکاری ماددی لە وڵاتانی دیکەوە وەربگرن.

- حکومەت پیشوازی لە داواکارییەک کردووە، بۆ ئەوەی لە گشت ناوچە سونییەکان لەجیاتی بڵاوبوونەوەی سەلەفییەکان سۆفییەکان شوێنیان بگرنەوە. 

- گومان دەکرێت عێراق ترسی لەوە هەبێت، کە ئەزموونی سووریا لە عێراق دووبارە بێتەوە، هەرچەندە هیچ لێکچوونێک لەنێوانیاندا نییە، بەڵام دەیانەوێت پێشوەختە ڕێگری لەوە بکەن. 

- بابەتی هەڵبژاردنی عێراقیش لە ئارادایە، دەترسن ئەو کەسانەی سەلەفییەکان دەنگیان پێدەدەن دەنگێکی زۆر بهێنن، بۆیە دەیانەوێت لاوازی بکەن. 

لەلایەکی دیکەوە: ڕێبەری ڕەوتی سەلەفییەکان لە هەرێمی کوردستان، لەبارەی بڕیارەکەوە دەڵێت، پێویستە عێراق بە بڕیارەکەدا بچێتەوە و دادپەروەرانە مامەڵە لەگەڵ ڕاجیاوازەکان بکات، لە ڕێگەی گفتوگۆ و زمانی زانستییەوە بابەتەکە چارەسەر بکرێت، نەک زمانی هەڕەشە و سەرکوتکردن. 

- حیزبە ئیسلامییەکان بە سەلەفییەکان دەڵێن، مەدخەلین و تۆمەتی ئەوە دەدەنە پاڵیان، گوایە لەگەڵ حکومەت و دەسەڵاتدان، لەلایەکی دیکەشەوە حکومەت بڕیاری قەدەغەکردنیان دەدات، کە پیاوی دەسەڵات بن بۆچی هەموو چالاکییەکانیان ڕادەگیرێت؟، ئەم پرسیارە بەس بۆ ئاقڵەکانە.