ترەمپ: ڕووسیا هێرشی سەربازی ناکاتە سەر فینلەندا و نەرویج

ئاڤا نیوز

دۆناڵد ترەمپ دڵنیایی دەدات بە فینلەندا و نەرویج لە ڕوونەدانی جەنگ و ڕایدەگەیەنێت ڕووسیا هیچ هێرشێکی سەربازی ناکاتە سەریان.

چیرۆکی سەرەکی: وێنەی مانگی دەستکرد بڵاوکراوەتەوە ئەوە دەسەلمێنێت ڕووسیا لەسەر سنوری فینلەندا ئامادەکارییەکی گەورەی سەربازی دەکات، لە وێنەکاندا سەدان خێمەی سەربازی، کۆگای تانک و ئۆتۆمبێل و کەل و پەلی سەربازی، نوێکردنەوەی بنکەی فڕۆکە جەنگییەکان و دروستکردنی بنکەی سەربازی نوێ بۆ هەلیکۆپتەر و فڕۆکەی بێفڕۆکەوان بەدیدەکرێت.

لێدوانی فەرمی: دۆناڵد ترەمپ، سەرۆکی ئەمریکا لە وەڵامی پرسیاری ڕۆژنامەنووساندا لە کۆشکی سپی ڕایگەیاند: هەست بە هیچ نیگەرانیەک ناکەم سەبارەت بەو ڕاپۆرتانەی باس لە هێزی گەورەی ڕووسیا دەکەن لە سەر تەواوی سنوری فینلەندا، هەمووتان دڵنیا دەکەمەوە فینلندا و نەرویج پارێزراو دەبن و ڕووسیا هێرش ناکاتە سەر هیچ دەوڵەتێکی ئەندام لە ناتۆ.

ئەوەی پێویستە بیزانیت: ئامادەکارییە سەربازییەکانی ڕووسیا بە درێژایی سنووری فینلەندا کە نوێترین ئەندامی ناتۆیە لە کاتێکدایە جەنگی نێوان ڕووسیا و ئۆکراینا بۆ زیاد لە سێ ساڵە بەردەوامی هەیە و مەرجی ڕووسیا بۆ ڕاگرتنی جەنگ دەستبەرداربوونی کیێڤە لە داواکاری بەئەندامبوون لە ناتۆ.