گەنجێکی کورد لە پێشبڕکێیەکی زانستی لەسەر ئاستی 78 زانکۆ پلەی یەکەم بەدەستدەهێنێت

ئاڤا نیوز

نوێگەریی گەنجێکی کورد پەرە بە کەرتی بیناسازی جیهان دەدات و لە پێشبڕکێیەکدا لە وڵاتی ئیمارات لەسەر ئاستی 78 زانکۆی وڵاتانی عەرەبی پلەی یەکەم بەدەستدەهێنێت.

چیرۆکی سەرەکی: گەنجێکی کورد بەشداری لە پێشبڕکێیەکی زانکۆی ئەبووزەبی لە ئەبووزەبیی پایتەختی ئیمارات دەکات، لەسەر ئاستی ڕۆژهەڵاتی ناوەڕاست پلەی یەکەم بەدەستدەهێنێت.

لێدوانی فەرمی: مەحموود خالید بە ئاڤای ڕاگەیاند: لەڕێگەی بیرۆکەیەکەوە توانیم لەسەر ئاستی 78 زانکۆ لە وڵاتە عەرەبییەکان و نزیکەی 650 کەس پلەی یەکەم بەدەستبهێنم، هەروەها بڕی 10 هەزار درهەمی ئیماراتی وەک خەڵاتی یەکەمی پێشبڕکێیەکە وەربگرم.

ئەوەی پێویستە بیزانیت: داهێنانەکەی ئەو گەنجە لە چوارچێوەی کاری ئامێرەکانی تایبەت بە بیناسازییە و لەژێر ناونیشانی Automation of Vertical Sky Crane بووە، مەبەست لێی کاری کرێن تاوەرەکانە کە بەشێوەی خودکار خۆی دروست بکات و پێویستیی بە دەستی کاری مرۆڤ نەبێت.

زانیاریی زیاتر: یەکەمجارە کوردێک دەتوانێت لەم پێشبڕکێیەدا پلەی یەکەم بەدەست بهێنێت، هەروەها پێشبڕکێیەکە لەلایەن کۆمپانیایەکی ئەمریکییەوە پاڵپشتیی دەکرێت کە سەرمایەکەی دوو تریلیۆن دۆلارە.