کۆمیسیۆن: زیاتر لە ملیۆنێک و 800 هەزار کەس کارتی بایۆمەترییان نوێ کردووەتەوە

ئاڤا نیوز

کۆمیسیۆنی باڵای سەربەخۆی هەڵبژاردنەکانی عێراق ڕایدەگەیێنێت، زیاتر ملیۆنێک و 800 هەزار کەس کارتی بایۆمەترییان نوێکردووەتەوە، بە گشتی ژمارەی تۆمارکراوان دوای نوێکردنەوەی کارتی بایۆمەتری، گەیشتووەتە 21 ملیۆن و 147 هەزار و 292 کەس.

وێنە گەورەکە: بڕیارە 2025-11-11، هەڵبژاردنی خولی شەشەمی ئەنجوومەنی نوێنەرانی عێراق بەڕێوەبچێت، پڕۆسەی تۆمارکردن و نوێکردنەوەی تۆماری دەنگدەرانیش بەردەوامە.

لێدوانی فەرمی: جومانە غەلای، وتەبێژی کۆمیسیۆنی باڵای سەربەخۆی هەڵبژاردنەکانی عێراق، ڕایگەیاند، لە 25ـی ئازارەوە تاوەکو 4ـی حوزەیران، یەک ملیۆن و 807 هەزار و 698 کەس کارتی بایۆمەترییان نوێ کردووەتەوە. بە گشتی ژمارەی تۆمارکراوان دوای نوێکردنەوەی کارتی بایۆمەتری، گەیشتووەتە 21 ملیۆن و 147 هەزار و 292 کەس.

ژمارەکان وادەڵێن: لە پارێزگاکانی هەرێمی کوردستان ژمارەی ئەوانەی کارتی بایۆمەتریان نوێکردووەتەوە، ژمارەیان دەگاتە 284 هەزار و 43 کەس. بە گشتی لە هەرسێ پارێزگاکەی هەرێمی کوردستان سێ ملیۆن و 57 هەزار و 107 کەس کارتی بایۆمەترییان هەیە.

لەلایەکی دیکە: سەبارەت بە پێشکەشکردنی داواکاری بۆ کارمەندانی سەر سندووقەکان دەنگدان، کۆمیسیۆن ڕایگەیاند، تاوەکو ئێستا 67 هەزار و 341 کەس لە سەرجەم پارێزگاکانی عێراق و هەرێمی کوردستان داواکاریان پێشکەشکردووە.