ئاڤا دوایین زانیاریی لەبارەی بەئەلیکترۆنیکردنی پسووڵەی خۆراک لە کوردستان بڵاودەکاتەوە

ئاڤا نیوز

بەڕێوەبەرایەتیی ڕێکخستنی پسووڵەی خۆراکی هەولێر هاووڵاتیان لە دوایین وادەی بەئەلیکترۆنیکردنی پسووڵەی خۆراک ئاگادار دەکاتەوە و ئاڤاش دوایین ڕێژەی بەشداریکردن لە سەرانسەری کوردستان ئاشکرا دەکات.

لێدوانی فەرمی: سیامەند قادر، بەڕێوەبەری ڕێکخستنی پسووڵەی خۆراکی هەولێر بە ئاڤای ڕاگەیاند: لەڕێگەی بریکارەکانی خۆراک و تۆڕە کۆمەڵایەتییەکانەوە ئاگاداری گشت هاووڵاتیانمان کردووەتەوە کە ڕۆژی شەممە 5-7-2025، دوایین وادەی بەئەلیکترۆنیکردنی پسووڵەی خۆراکە.

زانیاریی زیاتر: هەرێمی کوردستان خاوەنی پێنج ملیۆن و 385 هەزار و 820 پسووڵەی خۆراکە، بەم شێوەیە بەسەر پارێزگاکاندا دابەش بووە:

هەولێر: ملیۆنێک و 984 هەزار و 290 پسووڵە.

سلێمانی: ملیۆنیک و 969 هەزار و 751 پسووڵە.

دهۆک: ملیۆنیک و 316 هەزار و 792 پسووڵە.

هەڵەبجە: 114 هەزار و 987 پسووڵە.

ئەوەی پێویستە بیزانیت: نوێکردنەوەی پسووڵەکان بەپێی پارێزگاکان بەم شێوەیە:

هەولێر: زیاتر لە 231 هەزار پسووڵە نوێکراونەتەوە، ڕۆژانە نزیکەی 41 هەزار پسووڵە نوێ دەکرێنەوە.

سلێمانی: تاوەکو ئێستا 224 هەزار و 807 پسووڵە نوێکراونەتەوە، ڕۆژانە نزیکەی 32 هەزار پسووڵە نوێ دەکرینەوە.

دهۆک: نزیکەی 159 هەزار پسووڵە نوێکراونەتەوە و ڕۆژانە زیاتر لە 33 هەزار پسووڵە نوێ دەکرینەوە.

هەڵەبجە: زیاتر لە 75 هەزار پسووڵە نوێکراونەتەوە و ڕۆژانە نزیکەی دوو هەزار پسووڵە نوێ دەکرێنەوە.