ماکرۆن: ئێران بەردەوام بێت فەرەنسا بێ وەڵام نامێنێتەوە

ئاڤا نیوز

سەرۆکی فەرەنسا هۆشداری تووند دەدات بە ئێران و داوای ڕاگرتنی هێرشەکان بۆ سەر ئیسرائیل دەکات.

وێنە گەورەکە: لێکەوتەکانی هێرشی ئیسرائیل بۆ سەر ئێران و کوشتنی فەرماندە سەربازی و زانا ئەتۆمیەکان، لە بەرامبەردا وەڵام و هەڕەشەکانی ئێران، جیهان و ڕۆژهەڵاتی ناوەڕاستی خستۆتە مەترسیدارترین دۆخ و قۆناغی سیاسی و سەربازییەوە، هەردوولا بەرەو ئاراستەی جەنگی مەزن ئامادەکاری دەکەن و هەوڵی کۆکردنەوەی پشتیوانی سەربازی وڵاتانی دیکە دەدەن.

لێدوانی فەرمی: ئیمانوێل ماکرۆن، سەرۆکی فەرەنسا لە لێدوانێکیدا بۆ ڕۆژنامەنوسان ڕایگەیاند: فەرەنسا نایەوێت بەشداربێت لە هیچ جەنگێک و چارەسەری دیپلۆماسی بە باشترین ڕێگەچارە دەزانین بۆ چارەسەرکردنی ناکۆکیەکانی نێوان ئێران و ئیسرائیل، بەڵام گەر بێت و ئێران بەردەوام بێت لە هێرشکردنە سەر ئیسرائیل ئەوا فەرەنسا بەشدار دەبێت لە پارێزگاریکردن لە ئیسرائیل و پێشوەختە ئامادەیی سوپا و هێزی ئاسمانیمان ڕاگەیاندووە.

لەلایەکی دیکەوە: ئەمڕۆ شەممە پاکستان بە ڕاشکاوانە پشتیوانی خۆی بۆ ئێران دەربڕی و وەزیری بەرگری ئەو وڵاتە ڕایگەیاند بە هەموو شێوەیەک ئامادەن پارێزگاری لە ئێران و بەرژەوەندییەکانی بکەن.