ترەمپ و پووتین هەوڵی ڕاگرتنی جەنگی ئیسرائیل و ئێران دەدەن

ئاڤا نیوز

کۆشکی کرێملین ڕایگەیاند، پووتین و ترەمپ سەبارەت بە جەنگی نێوان ئیسرائیل و ئێران پەیوەندی تەلەفۆنییان ئەنجامداوە. کرێملین ئامادەیە بۆ نێوەندگیریی نێوان ئیسرائیل و ئێران بۆ ڕاگرتنی جەنگەکە.

چیرۆکی سەرەکی: بەرەبەیانی ڕۆژی هەینی 13-6-2025، ئیسرائیل هێرشێکی بەرفراوانی کردە سەر دامەزراوە ئەتۆمییەکانی ئێران و ماڵی چەندین سەرکردەی سوپای پاسدارانیشی بە ئامانج گرت، بنیامین نەتانیاهۆ، سەرۆکوەزیرانی ئیسرائیل سەبارەت بە هێرشەکان ڕایگەیاند لە ناوبردنی تەواوی بنکە ئەتۆمییەکانی ئێران ئامانجیانە.

ڕاگەیێنراوی فەرمی: کۆشکی کرێملین ڕایگەیاند، دۆناڵد ترەمپ، سەرۆکی ئەمریکا بە ڤلادیمێر پووتین، سەرۆکی ڕووسیای وتووە، شاندی ئەمریکا ئامادەن بۆ دەستپێکردنەوەی دانوستانەکانیان لەگەڵ شاندی ئێران.

ئاماژە بەوەشکراوە، پووتین ئامادەیی خۆی بۆ نێوەندگیری لە نێوان ئیسرائیل و ئێراندا نیشانداوە.

لێدوانی فەرمی: یۆری ئوشاکۆڤ، یاریدەدەری سەرۆکایەتی ڕووسیا ڕایگەیاند، لە پەیوەندییە تەلەفۆنییەکەدا لەگەڵ ترەمپ، پووتین هێرشی سەربازی ئیسرائیلی دژی ئێران ئیدانە کردووە و نیگەرانی خۆی لە دەرئەنجامە ناوچەییەکانی دەربڕی.

هاوکات وتیشی، دۆخێکی مەترسیدار لە ڕۆژهەڵاتی ناوەڕاست پەرەدەسەنێت.