دابەشکردنی مووچەی حەشدی شەعبی کێشەی تێدەکەوێت

ئاڤا نیوز

قەیرانێکی نوێ بەرۆکی دۆسیەی مووچەی ئەندامانی دەستەی حەشدی شەعبی لە عێراق گرتووە و بووەتە هۆی دواکەوتنی مووچەکانیان، لە کاتێکدا دوو ڕاڤەی دژ بەیەک بۆ هۆکاری کێشەکە دەخرێنەڕوو.

چیرۆکی سەرەکی: چەند ڕۆژێک بەسەر دابەشکردنی مووچە تیپەڕیوە، کەچی تا ئێستا ئەندامانی حەشدی شەعبی مووچەیان وەرنەگرتووە، لە لایەک، فەرماندەکانی حەشد و هەندێک پەرلەمانتار جەخت لە "فشار و دەستێوەردانی ڕاستەوخۆی ئەمریکا" دەکەنەوە. لە لایەکی دیکەوە، لایەنە فەرمییەکان وەک لیژنەی دارایی پەرلەمان، هۆکارەکە بۆ "کێشەیەکی تەکنیکیی کاتی" دەگەڕێننەوە.

لێدوانە فەرمییەکان:

مەیسەم زەیدی، فەرماندەی فیرقەی عەباس دەڵێت، گەنجینەی ئەمریکا هەڕەشەی سزای لەو کۆمپانیا تایبەتە کردووە کە مووچەی حەشد دابەش دەکات، ئەمەش وای لێکردووە لە پرۆسەکە بکشێتەوە.

پەرلەمانتار مستەفا سەنەد، هۆکاری ڕاگرتنی کاراکردنی کارتەکانی پارەدانی ئەلیکترۆنی تایبەت بە ئەندامانی دەستەی حەشدی شەعبی بۆ "دەستێوەردانی دەرەکی" گەڕاندەوە و ڕایگەیاند، "مووچەکە خراوەتە سەر ئەژمارەکانیان، بەڵام دەستێوەردانی دەرەکی کاراکردنی کارتەکانی ڕاگرتووە".

موعین کازمی، ئەندامی لیژنەی دارایی پەرلەمانی عێراق، بە ئاڤا میدیای ڕاگەیاند، کێشەکە تەنیا "هەڵەیەکی تەکنیکی"ـیە و حکومەت پابەندە بە خەرجکردنی مووچەکان لە نزیکترین کاتدا، هاوکات هەر جۆرە فشارێکی دەرەکی ڕەتدەکاتەوە.

ئەم قەیرانە لە چوارچێوەی هەوڵە بەردەوامەکانی ئەمریکادایە بۆ سنووردارکردنی گەیشتنی دۆلار بە ئێران و هاوپەیمانەکانی لە ناوچەکە.

زانیاریی بەدەستهاتوو: بەپێی ڕاپۆرتێکی ڕۆژنامەی "وۆڵ ستریت جۆرناڵ"ـی ئەمریکی، "گرووپە چەکدارەکانی سەر بە میحوەری ئێرانی لە عێراق توانای دەستگەیشتنیان بە دراوی ئەمریکی لەدەستدا، بۆیە بە خێرایی پەنایان بردە بەر پلانی گۆڕینەوەی دراو لەڕێگەی کارتە ئەلیکترۆنییەکانەوە."

لەلایەکی دیکەوە: ڕاپۆرتە ڕۆژنامەوانییە نێودەوڵەتییەکان ئاشکرایان کردووە کە دوای تووندکردنی ڕێکارەکان لەسەر حەوالە بانکییەکان، گرووپە چەکدارەکان پەنایان بۆ سیستمی پارەدانی ئەلیکترۆنی (ڤیزا و ماستەرکارد) بردووە، ئەمەش بووەتە هۆی ئەوەی هەندێک بانکی عێراقی خزمەتگوزارییە نێودەوڵەتییەکانیان ڕابگرن، کە لێکەوتەی ڕاستەوخۆی لەسەر کەرتی بانکی و ئابووریی عێراق دروست کردووە.