کۆمیسیۆن: کڕین و فرۆشتن بە کارتی دەنگدان سزای قورسی لەسەرە

ئاڤا نیوز

كۆمیسیۆنی باڵای سەربەخۆی هەڵبژاردنەكانی عێراق، هۆشداری تووند بە هاوڵاتیان، كاندید و پارتەكان دەدات كە هەوڵی كڕین و فرۆشتنی دەنگی دەنگدەران دەدەن و دەڵێت، "سزاكان دەگاتە دوورخستنەوەی كاندیدەكان و هەڵوەشاندنەوەی لایەنە سیاسییەکان و هاوپەیمانیەكان".

چیرۆکی سەرەکی: بڕیارە 11ـی 11ـی ئەمساڵ، هەڵبژاردنی پەرلەمانی عێراق بەڕێوەبچێت، 26ـی حوزەیرانیش کۆمیسیۆن کۆتاییهاتنی ماوەی پێشکەشکردنی لیستی کاندیدی لایەنە سیاسییەکانی ڕاگەیاند و ئاشکرای کرد نزیکەی پێنج هەزار کاندید بەشداریی لەهەڵبژاردنی ئایندەدا دەکەن.

ڕاگەیێنراوی فەرمی: کۆمیسیۆنی باڵای سەربەخۆی هەڵبژاردنەکانی عێراق ڕایگەیاند: هەموو لایەک ئاگادار دەکەینەوە کە فرۆشتن یان کڕینی کارتی بایۆمەتریی دەنگدەران یان هەوڵدان بۆ فرۆشتن یان کڕینی ئەو جۆرە کارتانە یان بەکارهێنانی سامانی دەوڵەت بۆ مەبەستی هەڵبژاردن تاوانی هەڵبژاردنن و بەپێی یاسا سزا دەدرێن ئینجا سەرپێچیکارەکە دەنگدەر بێت، کاندید بێت، هاوپەیمانی بێت، یان لایەنێکی سیاسی بێت.

زانیاریی زیاتر: کۆمیسیۆن ئاماژە بەوەش دەکات، سزای دیکەی ڕێگریکردن لە سەرپێچیکردنی یاسا و ڕێنماییەکانی هەڵبژاردن دەگرێتەبەر لەوانەش دوورخستنەوەی کاندیدەکان و هەڵوەشاندنەوەی پەسەندکردنی هاوپەیمانی و لایەنە سیاسییە سەرپێچیکارەکان.