حکومەت لە کرێی ساڵانە و شەش مانگی کۆکردنەوەی خاشاکی دووکاندارانی لەنگە خۆش دەبێت

ئاڤا نیوز

حکومەتی هەرێمی کوردستان بڕیاری داوە لە کرێی ساڵانە و شەش مانگ باجی کۆکردنەوەی خۆڵ و خاشاکی ئەو دووکاندارانەی لەنگە خۆش بێت کە بەهۆی سووتانی دووکانەکەیانەوە زیانیان بەرکەوتووە. 

لێدوانی فەرمی: ئومێد خۆشناو، پارێزگاری هەولێر بۆ ئاڤا نیوز گوتی: "حکومەتی هەرێمی کوردستان قەرەبووی زیانلێکەوتووانی ڕووداوی ئاگرەکەی لەنگە دەکاتەوە و لە کرێی ساڵانە و شەش مانگ باجی کۆکردنەوەی خۆڵ و خاشاکی دووکانەکانیان، خۆش دەبێت".

 

زانیاریی زیاتر: بازاڕی لەنگەی هەولێر زیاتر لە دوو هەزار و 400 دووکان لەخۆدەگرێت، تەنیا 162 بۆ 166 دووکان زیانیان پێگەیشتووە، هەندێکیان سووتانی مامناوەند و ئەوانەشی لە سەرچاوەی ئاگرەکەوە نزیکبوون بەتەواوی سووتاون.

 

باکگراوند: ئێوارەی ڕۆژی چوارشەممە 28-02-2024، ئاگرێکی گەورە لە بازاڕی لەنگەی هەولێر کەوتەوە و بەهۆیەوە زیاتر لە 160 دووکان زیانێکی زۆری ماددیان بەرکەوت، دەستبەجێ لیژنەیەک بۆ لێکۆڵینەوە لە هۆکارەکەی و خەمڵاندنی زیانەکان پێکهێنرا.