سووریا بە گرێبەستێکی 800 ملیۆن دۆلاری بەندەرەکانی نۆژەندەکاتەوە

ئاڤا نیوز

بە ئامادەبوونی ئەحمەد شەرع، سەرۆککۆماری سووریا دەستەی دەروازە سنوورییەکانی سووریا گرێبەستێک بە بەهای 800 ملیۆن دۆلار لەگەڵ کۆمپانیایەکی ئیماراتی لەپێناو نۆژەنکردنەوەی بەندەرەکانی واژۆ کرد.

وێنە گەورەکە: وەکو درێژەدان بەو یاداشتە لێکتێگەیشتنەی لە مانگی ئایاری ڕابردوو لە نێوان هەردوولا واژۆیان کرا، حکومەتی سووریا و کۆمپانیای "بەندەرەکانی جیهانیی دوبەی" گرێبەستێکی ستراتیژیی پەیوەست بە دووبارە بوونیادنانەوە و نۆژەنکردنی بەندەرەکانی سووریایان واژۆ کرد، ئەم گرێبەستە هەزاران هەلی کار دەرەخسێنێت.

ڕاگەیێنراوی فەرمی: دەستەی گشتیی دەروازە سنوورییە وشکانی و دەریاییەکانی سووریا ڕایگەیاند؛ گرێبەستێكی هاوبەشی ستراتیژی لەگەڵ کۆمپانیای "بەندەرەکانی جیهانیی دوبەی" بە بەهای 800 ملیۆن دۆلار، بەئامانجی نۆژەنکردنەوەی ژێرخانی بەندەرەکانی سووریا و باشترکردنی خزمەتگوزارییەکانی لۆجستی.

زانیاریی زیاتر: ڕێککەوتنەکە کاری پەرەپێدان و نۆژەنکردنەوەی گشتگیر لەخۆدەگرێت لەوانەش؛ جێگاکانی جێگیرکردنی کەشتییەکان، دامەزراوەکانی بارکردن و داگرتن، جگە لە باشترکردنی پەیوەندی بەندەرەکان بە تۆڕەکانی گواستنەوەی وشکانی و دروستکردنی سیستەمی زیرەک بۆ بەدواداچوونی کاڵاکان و هەماهەنگیکردنی جووڵەی بارهەڵگرەکان، ئەمەش وەک بەشێک لە هەوڵەکان بۆ کەمکردنەوەی تێچووی لۆجستی و خێراکردنی پرۆسەکانی کارکردن.