شەش گەنجی کورد لە لیبیا ژیانیان لە مەترسیدایە

ئاڤا نیوز

شەش گەنجی کورد لە لیبیا ژیانیان لە مەترسیدایە، ئاڤا دەست بە هەوڵەکانی دەکات بۆ ئازادکردنی ئەو گەنجانە و لایەنە پەیوەندیدارەکانی پەیوەست بە بابەتەکە دێنێتە سەر هێڵ.

وێنە گەورەکە: لیبیا بووە بە یەکێک لە ڕێڕەوەکانی گەیشتن بە وڵاتانی ئەورووپا بە ڕێگای نایاسایی، بەشێک لە گەنجانی کوردستان و وڵاتانی دیکەی ناوچەکە بۆ گەیشتن بە کەناراوەکانی ئیتاڵیا ڕێگای ئەو وڵاتە بەکاردەهێنن، بەڵام لەو وڵاتە لەلایەن هێزە ئەمنییەکان دەستگیر دەکرێن و ڕووبەڕووی دۆخی نەخوازراو و ئەشکەنجەدانیش دەبنەوە.

چیرۆکی سەرەکی: پێنج گەنجی خەڵکی چوارقوڕنە و گەنجێکی دۆڵی شاورێ لە سنووری قەزای ڕانیە، ڕۆژی دووشەممە 8-7-2025 لە فڕۆکەخانەی هەولێرەوە بەرەو عەممانی ئوردن بەڕيکەوتوون، لەوێشەوە چوونەتە بەنغازی لە لیبیا، دووشەممەی ڕابردوو 21-7-2025 ویستویانە لە بەنغازییەوە بڕۆنە تەرابلووس، بەڵام هەر لە بەنغازی دەستگیر کراون.

 
زانیاریی بەدەستهاتوو: ئەو شەش گەنجە کەوتوونەتە بەندیخانەیەک کە تاوەکو ئێستا ئاشکرا نەکراوە، لە ماوەی حەوت ڕۆژی ڕابردوو دووجار لەڕێگەی وەتسئاپی کەسێکی نێو بەندیخانەکەوە نامەی دەنگیان بۆ خێزانەکانیان ناردووە و باسی خراپی دۆخی خۆیان دەکەن، جارێک بە 40 دۆلار و جارێک 25 دۆلاریان بۆ ئەو نامە دەنگیانە لێ وەرگیراوە، بەگوێرەی نامە دەنگییەکان ئەو گەنجانە لە دۆخێکی سەختی مرۆییدان، تەنانەت پییان گوتراوە "ئێوە لە عێراق هاتوون و دەبێت دەرزیتان لێ بدرێت".

لێدوانە فەرمییەکان: ئاڤا میدیا گفتوگۆی لەگەڵ خێزانی ئەو شەش گەنجە، فەرمانگەی پەیوەندییەکانی دەرەوەی حکومەتی هەرێمی کوردستان و سەرۆکی فراکسیۆنی پارتی لە ئەنجوومەنی نوینەرانی عێراق کردووە.

سوهەیل مەحموود، برای یەکێک لەو گەنجانە بە ئاڤای گوت: گەنجەکانمان لە بارودۆخێکی سەختدان و داوای بە هاناوەچوون لە لایەنە پەیوەندیدارەکان دەکەین، خێزانەکانمان کەوتوونەتە نیگەرانی و دڵەڕاوکێیەکی قووڵەوە و هیچمان لەدەست نایەت بۆ ئەو گەنجانەی بکەین.

ئاڤا پەیوەندیی بە سەلیم پاشا، ڕاوێژکاری پێشکەوتووی فەرمانگەی پەیوەندیییەکانی دەرەوەی حکومەتی هەرێمی کوردستان کرد و تەواوی زانیارییەکانی پێگەیاند، ناوبراو بە ئاڤای گوت: ڕاستەوخۆ هەوڵەکانمان بۆ دۆزینەوە ئەو گەنجانە دەستپێکردووە و هەوڵ دەدەین بە زووترین کات ئازاد بکرێن و بگەڕێنرینەوە نیو خێزان و کەسوکاریان. 

 

ئاڤا داواکاریی بنەماڵەی ئەو شەش گەنجەی بە زمانی عەرەبی گەیاندە ڤیان سەبری، سەرۆکی فراکسیۆنی پارتی و ئەندامی لیژنەی پەیوەندییەکانی دەرەوە لە پەرلەمانی عێراق، ڤیان سەبری بە ئاڤای ڕاگەیاند: داواکارییەکەیان ئاراستەی وەزارەتی دەرەوەی عێراق دەکەم، تاوەکو کار بۆ دۆزینەوە و گەڕانەوەی ئەو گەنجانە بکرێت.

زانیاریی زیاتر: ئاڤا میدیا ناوی سیانی، پاسپۆرت و وێنە، تەنانەت ئەو ژمارەیەی لە بەندیخانەکەوە تەلەفۆنیان بۆ کوردستان کردووە، داوەتە لایەنە پەیوەندیدارەکان و ناوی ئەو گەنجانەش بڵاودەکاتەوە:

1- فەرهەنگ بەختیار ڕەسووڵ
2- سەرهەنگ ساڵح مستەفا
3- سەیوان مەحموود مەحموود
4- ڕامیار سەباح محەممەد
5- ئیبراهیم حەمەد ساڵح
6- ئەحمەد مەولوود مستەفا

 

زانیاریی زیاتر:  تا ئێستا زیاتر لە 200 گەنج لەو رێگایە گیراون، بە هەوڵی ئاڤا ڕۆژی دووشەممە 24 گەنج دۆزرانەوە و گەڕێنرانەوە.