زریانی تۆز و خۆڵ لە سووریاوە ڕوو لە بەشێکی عێراق دەکات

ئاڤا نیوز

پێشبینی دەکرێت، ناوچەکانی ڕۆژئاوای عێراق ڕووبەڕووی زریانی تۆز و خۆڵ ببنەوە و ئەگەری هەیە مەودای بینین لە بەشێکی پارێزگای ئەنبار کەمببێتەوە.

وێنە گەورەکە: عێراق یه‌كێكه‌ له‌و وڵاتانه‌ی زۆرترین زیانی گۆڕانکاری کەشوهەوای بەرکەوتووە، بەو هۆیەشەوە ساڵانە خۆڵبارینی چڕ ڕوو لە زۆربه‌ی پارێزگاکانی ناوەڕاست و باشوور دەکات.

لێدوانی فەرمی: سادق عەتیە، شارەزای کەشناسی، ڕایگەیاند: پێشبینی دەکرێت ئەمڕۆ هەینی 1-8-2025 زریانێکی تۆز و خۆڵ لە سووریاوە ڕوو لە ڕۆژئاوای عێراق بکات، هاوکات خێرایی با لە بیبانەکان، وادەکات تۆز و خۆڵ لە ناوچەکانی پارێزگای ئەنبار بەرز ببێتەوە.

لەلایەکی دیکەوە: سەرچاوەیەک لە دەستەی کەشناسیی عێراق دووپاتی کردەوە، ئەگەری هەیە مەودای بینین لە هەندێک ناوچەی پارێزگای ئەنبار نزم ببێتەوە و ناوچەکانی دیکەی عێراقیش تۆز و خۆڵبارینێکی سووک بەخۆیانەوە ببینن.