هاککەرانی چین لە ڕێگەی سیستمی مایکرۆسۆفتەوە هێرش دەکەنە سەر دامەزراوەکانی ئەمریکا

ئاڤا نیوز

کۆمپانیای مایکرۆسۆفت و بەرپرسانی ئەمریکی هۆشداری دەدەن لەبارەی زنجیرەیەک هێرشی ئەلیکترۆنی بەرفراوان کە لەلایەن گرووپە هاککەرەکانی سەر بە چینەوە ئەنجام دەدرێن.

چیرۆکی سەرەکی: گرووپێکی هاککەری چینی خاڵە لاوازە نوێیەکانیان لە سێرڤەرەکانی "شەیرپۆینت"ـی مایکرۆسۆفت قۆستووەتەوە و سەدان ڕێکخراو و ئاژانسی حکومییان لە سەرانسەری جیهاندا کردووەتە ئامانج.

زانیاریی بەدەستهاتوو: بەپێی ڕاپۆرتەکان، هێرشەکان لە سەرەتای مانگی حەوتەوە دەستیان پێکردووە و ئامانجیان بەدەستهێنانی دەستڕاگەیشتن بووە بە ڕێکخراوەکان.

زانیاریی زیاتر: مایکرۆسۆفت سێ گرووپی هاککەری چینی دەستنیشان کردووە کە لەم هەڵمەتەدا بەشدارن،  لاینن تایفون، ڤایۆلێت تایفون ، و ستۆرم-2603، ئەم گرووپانە ناسراون بەوەی کە لەلایەن چینەوە پشتیوانی دەکرێن و بە شێوەیەکی تایبەت هێرش دەکەنە سەر دامەزراوەکانی حکومەت، بەرگری و مافی مرۆڤ.

ئەوەی لەبارەیەوە دەگوترێت: کۆمپانیای ئای سیکیوریتی کە کۆمپانیایەکی هۆڵەندییە لە بواری ئاسایشی ئەلیکترۆنیدا، ڕایگەیاندووە، زیاتر لە 400 سیستم بەهۆی ئەم هێرشانەوە زیانیان بەرکەوتووە، لەنێویاندا چەندین ئاژانسی حکومەتی ئەمریکا وەک ئاژانسی ئاسایشی ئەتۆمی نیشتمانی و وەزارەتی ئاسایشی ناوخۆ .

بۆچوونی لایەنی بەرامبەر: چین بەردەوام ئەم تۆمەتانە ڕەتدەکاتەوە و دەڵێت کە خۆی قوربانی هێرشی ئەلیکترۆنییە.