لە هەولێر ئامادەکارییەکان بۆ هەڵبژاردنی پەرلەمانی عێراق دەستی پێکرد

ئاڤا نیوز

بۆ بەڕێوەچوونی پرۆسەی هەڵبژاردنی پەرلەمانی عێراق ، لیژنەی ئەمنی هەڵبژاردنی پارێزگای هەولێر دەستی بە ئامادەکارییەکان کرد.

وێنە گەورەکە: بڕیارە 11ـی 11ـی ئەمساڵ، هەڵبژاردنی پەرلەمانی عێراق بەرێوەبچێت، لەگەڵ نزیکبوونەوەی وادەی هەڵبژاردن، ئامادەکارییەکانی ئەم پرۆسەیە هەنگاو بە هەنگاو بەرەوپێشدەچێت، هاوتەریب لەگەڵ ئامادەکارییەکانی کۆمسیۆن، لە پارێزگای هەولێریش ئامادەکارییەکان دەستی پێکرد.

ڕاگەیێنراوی فەرمی: لە ڕاگەیێنراوێکی پارێزگای هەولێردا هاتووە، بە بەشدارى بەرپرسى نووسینگەى هەولێرى کۆمسیۆنى باڵاى سەربەخۆیى هەڵبژاردنەکان، کۆبوونەوەی لیژنەی ئەمنی هەڵبژاردنى پارێزگا بەڕێوەچوو، تێیدا بڕیادرا ئامادەکارییەکان بۆ پرۆسەی هەڵبژاردن دەست پێبکات و ئەرک و کارەکانى هێزەکانی ناوخۆ، بەرگریی شارستانی، فەرمانگە خزمەتگوزارییەکانى دیکەی بەپێى ڕێکار و ڕێوشوێنی پێویست دەستنیشانکران.

بەتەنیشت ئەم بابەتەوە: کۆمیسیۆنی باڵای سەربەخۆی هەڵبژاردنەکان بەپێی خشتەی کار لە ئامادەکارییەکانی بەردەوامە ، پرۆسەی وردبینی لە لیست و کاندیدان بەردەوامە، ئامادەکاریش دەکرێت بۆ ئەوەی ڕۆژی شەممە 2025-08-09، تیروپشک بۆ دیاریکردنی ژمارەی هاوپەیمانێتییەکان، پارتە سیاسییەکان و کاندیدە سەربەخۆکان بکرێت.

لێدوانی فەرمی: زانا عوسمان، بەڕێوەبەری ڕاگەیاندن لە دەستەی هەڵبژاردنەکانی هەرێمی کوردستان بە ئاڤای وت: لە چوارچێوەی ئامادەکارییەکانی کۆمیسیۆن، دەستمان کردووە بە ئەنجامدانی خول و ڕاهێنان بۆ نوێنەرانی کیانەکان، کارمەندانی کۆمیسیۆن و چاودێران.