هەزار و 500 مێگاوات کارەبا زیاد دەکرێت

ئاڤا نیوز

بڕیارە تا مانگی سێی ساڵی داهاتوو هەزار و 500 مێگاوات کارەبا زیاد بکرێت، بەمەش بڕی بەرهەمهێنانی کارەبا سەرووی چوار هەزار مێگاوات.

وێنە گەورەکە: ژێرخانی کارەبای هەرێمی کوردستان توانای بەرهەمهێنانی هەشت هەزار و 200 مێگاوات کارەبای هەیە، ئێستا سووتەمەنی پێویست بۆبەرهەمهێنانی چوار هەزار و 200 مێگاوات بەردەستە و حکومەت کار لەسەر ئەوە دەکات سووتەمەنی زیاتر بۆ یەکەکانی بەرهەمهێنانی کارەبا دابین بکات.

لێدوانی فەرمی: فارس میرخان، بەڕێوەبەری گشتیی گواستنەوەی کارەبای هەرێمی کوردستان بە ئاڤای گوت: کار لەسەر پرۆژەیەک دەکەین بۆ زیادکردنی 200 ملیۆن پێ سێجا گاز، ئەم پرۆژەیە تا مانگی سێی ساڵی داهاتوو تەواو دەبێت، لەم ڕێگەیەوە دەتوانین هەزار و 500 مێگاواتی دیکە کارەبا بەرهەم بهێنین.

ئەوەی پێویستە بیزانیت: هەرێمی كوردستان خەریكە لە چارەسەریی تەواوەتیی گرفتی كارەبا نزیك دەبێتەوە و ئێستا بەرهەمهێنانی کارەبا لە هەرێمی کوردستان گەیشتووەتە چوار هەزار و 200 مێگاوات، لە کاتێکدا لە بەرزترین ئاستدا خواست لەسەر کارەبا دەگاتە پێنج هەزار و 500 مێگاوات، بەڵام جێبەجێکردنی پرۆژەی ڕووناکی کاریگەری کورتهێنانی کارەبای کەم کردووەتەوە.

باکگراوند: کابینەی نۆیەم بەرهەمهێنانی کارەبای بۆ هەزار و 840 مێگاوات زیاد کردووە، سێ هەزار و 503 پرۆژە بۆ دابەشکردنی کارەبای جێبەجێ کردووە.