کۆمیسیۆن دواین ئاماری پێشکەشکردنی لیستی ناوی بەربژێران ئاشکرا دەکات

ئاڤا نیوز

کۆمیسیۆنی باڵای سەربەخۆی هەڵبژاردنەکان ڕایگەیاند، دوو هاوپەیمانی و چوار حیزب لیستی بەربژێرەکانیان پێشکەش کردووە و ژمارەی بەربژێری سەربەخۆ بۆ 48 کەس بەرزبووەتەوە.

لێدوانی فەرمی: جومانە غەلای، گوتەبێژی کۆمیسیۆنی باڵای سەربەخۆی هەڵبژاردنەکانی عێراق بە ئاڤا نیوزی ڕاگەیاند: تاوەکو ئێستا چوار حیزب و دوو هاوپەیمانی له‌ هه‌ر چوار بازنه‌کەی هه‌رێمی كوردستان لیستی بەربژێرەکانیان پێشکەش کردووە.

زانیاریی زیاتر: هاوكات 48 بەربژێری سەربەخۆ ناویان پێشكەش بە كۆمسیۆن كردووە؛ لە هەولێر 12 بەربژێر و لە سلێمانی و هه‌ڵه‌بجه‌ 21 بەربژێر و لە دهۆكیش 15 بەربژێر خۆیان تۆمار كردووە.

ئەوەی پێویستە بیزانیت: ئەمڕۆ دواین وادەی تۆماركردنی ناوی بەربژێر بوو بۆ هەڵبژاردنی پەرلەمانی هەرێمی كوردستان، بەڵام وادەکەی بۆ کۆتایی ئەم مانگە درێژکرایەوە.

زانیاری بەدەستهاتوو: ئاڤا زانیویەتی ئەمڕۆ بەشێک لە حیزب و هاوپەیمانی ویستوویانە لیستی بەربژێرەکانیان پێشکەش بە کۆمیسیۆن بکەن، بەڵام بەهۆی ئەوەی ئاگەدارکراونەتەوە کە وادەکە درێژ دەکرێتەوە لیستەکانیان پێشکەش نەکردووە.

وێنە گەورەكە: ئامادەکارییەکانی کۆمیسیۆن بۆ هەڵبژاردن لەکاتێکدایە، کە پارتی ناڕەزایی لە شێوازی هەڵبژاردن هەیە.