مەریوان قەرەنی: چەند لایەنێك عێراق دەكەنە قوربانی حەشدی شەعبی

ئاڤا نیوز

ئەندامێكی لیژنەی ئاسایش و بەرگریی پەرلەمانی عێراق ڕایدەگەیەنێت، گرووپێك خەریكە عێراق دەكەنە قوربانیی حەشدی شەعبی و بە تێپەڕاندنی یاسای تایبەت بەو هێزە چەكدارانە، وڵات بەرەو تونێلێكی تاریك دەبەن.

وێنە گەورەکە: سەرەڕای دژایەتیكردنی ئاشكرای كۆمەڵگەی نێودەوڵەتی بۆ دەركردنی یاسای حەشدی شەعبی، بەڵام تا ئێستاش بەشێك لەلایەنە شیعەكان پێداگرن لەسەر دەنگدان بە یاساكە و تێپەڕاندنی لە پەرلەمانی عێراق.

لێدوانی فەرمی: مەریوان قەرەنی، بڕیاردەی فراكسیۆنی پارتی و ئەندامی لیژنەی ئاسایش و بەرگریی پەرلەمانی عێراق ڕایگەیاند، كۆمەڵگەی نێودەوڵەتی بۆچوونی وایە، تێپەڕاندنی یاسای حەشدی شەعبی و كردنی بە دەستەیەكی هاوتای وەزارەتی بەرگری، دەبێتە هۆی زیادبوونی هەژموونی وڵاتێكی ئیقلیمی و لاوازبوونی سەروەریی عێراق، سەرەنجامیش لێكەوتەی مەترسیدار بەدوای خۆیدا دێنێت.

زانیاریی تایبەت: بەشێك لە پەرلەمانتارانی سەر بە لایەنە شیعەكان، بۆ دانیشتنەكانی پەرلەمان جلوبەرگی حەشدی شەعبی دەپۆشن و لە تۆڕی كۆمەڵایەتیی وەتسئاپ، نامە بۆ گرووپی پەرلەمانتاران دەكەن كە قیاسی جلوبەرگیان بنێرن بۆ ئەوەی جلی حەشدی شەعبیان بۆ بدوورن و ڕۆژی دەنگدان لەسەر پرۆژەیاساكە، بەو جلانەوە بچنە نێو هۆڵی پەرلەمان.

كاریگەری و لێكەوتەكان: لە ئاستی ناوخۆی عێراق، هەریەك لە پێكهاتەی كورد، عەرەبی سووننە و بەشێكی بەرچاوی عەرەبی شیعە، دژی تێپەڕاندنی پرۆژەیاساكەن، لەكاتێكدا تێپەڕاندنی یاسایەكی تایبەت بەشەرعیكردنی گرووپێكی چەكداریی مەزهەبی، پێویستی بە كۆدەنگی نیشتمانی هەیە.

- ⁠لە ئاستی نێودەوڵەتی، ئەمریكا و هاوپەیمانەكانی بە ڕاشكاوی دژی یاساكەن و ڕەنگە پێشهاتی لەمجۆرە سەربكێشێت بۆ ئاستی هێرشكردنە سەر گرووپەكانی حەشدی شەعبی و سەپاندنی سزای دارایی و سیاسی بەسەر عێراق لەلایەن واشنتنەوە.