عێراق یەکەمەکانی هەرێمی کوردستان لە دامەزراندن بێبەش دەکات

ئاڤا نیوز

 

عێراق یەکەمەکانی زانکۆ و پەیمانگەكانی هەرێمی کوردستان لە دامەزراندن بێ بەش دەکات، ئەندامێكی ئەنجوومەنی نوێنەرانی عێراق دەڵێت " دامەزراندنەكە هاووڵاتییانی ناوچەکانی دەرەوەی ئيدارەی هەرێمیش دەگرێتەوە، بەڵام  یەکەمەکانی هەرێمی کوردستان ناگرێتەوە".

ئەوەی پێویستە بیزانیت: لەتەواوی عێراق 74هەزار  دەرچووی یەکەم و دووەم و سێیەم  و دکتۆرا و ماجستێر بوونی هەیە، لە ماوەکانی ڕابردوودا لە یاسای ئاسایشی خۆراکدا 43هەزار کەس دامەزرێنران،  ئێستا کار بۆ دامەزراندنی  ئەو 31 هەزار دەرچووەی دیكە دەکرێت. 

لێدوانی فەرمی: نەجوە حەمید کاکەیی، ئەندامی لیژنەی پەروەردە لە ئەنجوومەنی نوێنەرانی عێراق بە ئاڤا نیوزی ڕاگەیاند: کارکردن بۆ دامەزراندنی دەرچووانی یەکەمەکانی عێراق بەرە و تەواوبوون دەچێت تەنها کۆدی دامەزراندنیان ماوە، بەجۆرێک هاووڵاتییانی ناوچەکانی دەرەوەی ئێدارەی هەرێمیش دەگرێتەوە بەڵام  یەکەمەکانی هەرێمی کوردستان ناگرێتەوە.

زانیاریی زیاتر: ئەم دامەزراندنە دەرچووانی  دکتۆرا و ماجستێر  و یەکەمەکانی ساڵانی ڕابردوو، تاوەکو ساڵی 2023 دەگرێتەوە و دادەمەزرێنرێن.